ఐటా పాలక మండలిలో మహేశ్‌ భూపతి, సానియా మీర్జాకు చోటు

భారత టెన్నిస్‌ దిగ్గజాలు మహేశ్‌ భూపతి, సానియా మీర్జాలకు అఖిల భారత టెన్నిస్‌ సంఘం (ఐటా) పాలక మండలిలో చోటు దక్కింది. ఐటా ఎగ్జిక్యూటివ్‌ కమిటీ (ఈసీ) ఎన్నికల్లో మహేశ్‌ భూపతికి 23 ఓట్లు రాగా, సానియా మీర్జాకు 18 ఓట్లు లభించాయి. దీంతో వీరిద్దరూ సంఘం పాలక మండలిలో సభ్యులుగా బాధ్యతలు చేపట్టనున్నారు.

అంతకుముందు ఐటా సర్వసభ్య ఎన్నికల్లోనూ వీరిద్దరూ స్పోర్ట్స్‌పర్సన్స్‌ ఆఫ్‌ ఔట్‌స్టాండింగ్‌ మెరిట్‌ (ఎస్‌ఓఎమ్‌) కేటగిరీ ప్రతినిధులుగా ఎన్నికయ్యారు. ఈ ఎన్నికల్లో మహేశ్‌ భూపతికి 19, సానియా మీర్జాకు 18 ఓట్లు వచ్చాయి. అశుతోష్‌ సింగ్‌ 17 ఓట్లు, షాలిని ఠాకూర్‌ చావ్లా 16 ఓట్లు సాధించి మిగిలిన రెండు స్థానాలను దక్కించుకున్నారు. సవరించిన ఐటా నిబంధనల ప్రకారం ఎస్‌ఓఎమ్‌ ప్రతినిధులుగా ఇద్దరు పురుషులు, ఇద్దరు మహిళలకు అవకాశం కల్పిస్తారు.