సీజీహెచ్‌ఎస్‌ మందుల కొనుగోళ్లలో అక్రమాలపై సీబీఐ దర్యాప్తు

కేంద్ర ప్రభుత్వ ఆరోగ్య పథకం కేంద్రాల్లో మందుల కొనుగోళ్లలో జరిగినట్లు ఆరోపణలు ఎదుర్కొంటున్న అక్రమాలపై హైదరాబాద్‌ రేంజ్‌ సీబీఐ అధికారులు దర్యాప్తు ప్రారంభించారు. లార్వెన్‌ ఫార్మా సంస్థ, దాని యజమాని రమణయ్య, అసిస్టెంట్‌ మేనేజర్‌ వేణుగోపాల్‌, న్యూఎస్ఎస్‌ మెడికల్స్‌, ఆ సంస్థ వైద్య ప్రతినిధి చిరంజీవితో పాటు సీజీహెచ్‌ఎస్‌ ఉద్యోగులు శరవణన్‌, వైఎల్‌ఎన్‌ మూర్తి, పొన్నాల మహేష్‌, కృష్ణమూర్తిపై కేసు నమోదైంది.

అవసరం లేని మందులను పెద్ద మొత్తంలో కొనుగోలు చేసి, వాటి ద్వారా వచ్చిన భారీ కమీషన్లను సీజీహెచ్‌ఎస్‌ ఉద్యోగులు తమ బ్యాంకు ఖాతాల్లో జమ చేయించుకున్నట్లు ప్రాథమిక దర్యాప్తులో గుర్తించినట్లు సీబీఐ అధికారులు తెలిపారు. ఆయా ఉద్యోగుల ఖాతాల్లో అనుమానాస్పద లావాదేవీలు ఉన్నట్లు గుర్తించడంతో కేసు నమోదు చేసి, తదుపరి దర్యాప్తు చేపట్టినట్లు వెల్లడించారు.