రేషన్ లబ్ధిదారులకు కేంద్రం కీలక నిర్ణయం

దేశవ్యాప్తంగా ప్రజా పంపిణీ వ్యవస్థ (PDS)లో పారదర్శకతను పెంచడంతో పాటు, ఆరు నెలలుగా రేషన్ సరుకులు తీసుకోని లబ్ధిదారుల వివరాలను సమీక్షించేందుకు కేంద్ర ప్రభుత్వం కొత్త నిబంధనలు అమలు చేయనుంది. అక్టోబర్ 1, 2026 నుంచి ఇలాంటి రేషన్ కార్డులను తాత్కాలికంగా నిలిపివేయనున్నారు. దేశవ్యాప్తంగా సుమారు 1.58 కోట్ల మంది లబ్ధిదారులు ఈ ప్రక్రియ పరిధిలోకి వస్తున్నట్లు నివేదికలు పేర్కొంటున్నాయి. 2025లో సవరించిన టార్గెటెడ్ పబ్లిక్ డిస్ట్రిబ్యూషన్ సిస్టమ్ (TPDS) నిబంధనల్లో ఆరు నెలలుగా తమ కేటాయింపులను వినియోగించని లబ్ధిదారుల రేషన్ కార్డులను తాత్కాలికంగా నిలిపివేసి, తదుపరి మూడు నెలల్లో అర్హతను పునఃపరిశీలించాలని రాష్ట్ర ప్రభుత్వాలకు నిబంధన ఉంది.

తాత్కాలికంగా నిలిపివేసిన కార్డులను వెంటనే రద్దు చేయకుండా, అర్హత నిరూపించుకునేందుకు మూడు నెలల సమయం ఇవ్వనున్నారు. ఈ వ్యవధిలో లబ్ధిదారులు ఇ-కేవైసీ పూర్తి చేయడంతో పాటు, అవసరమైన చోట ఫీల్డ్ వెరిఫికేషన్ ద్వారా తమ అర్హతను నిర్ధారించుకోవచ్చు. అర్హత నిర్ధారణ పూర్తయిన తర్వాత రేషన్ కార్డును మళ్లీ యాక్టివేట్ చేసే అవకాశం ఉంటుంది. పీడీఎస్‌లో నకిలీ, డూప్లికేట్ లేదా అనర్హమైన లబ్ధిదారుల వివరాలను తొలగించి, అర్హులైన వారికి ఆహార ధాన్యాల ప్రయోజనాలు అందేలా డేటాబేస్‌ను ప్రక్షాళన చేయడం ఈ నిబంధనల ప్రధాన ఉద్దేశంగా ఉంది.