సంప్రదాయాలకు భిన్నంగా అనిరుధ్-కావ్యల పెళ్లి.. స్వాభిమానం పద్ధతిపై చర్చ

ప్రముఖ సంగీత దర్శకుడు అనిరుధ్ రవిచందర్, సన్‌రైజర్స్ హైదరాబాద్ సహ యజమాని కావ్య మారన్ వివాహ బంధంతో ఒక్కటయ్యారు. నవంబర్ 11న గ్రీస్‌లో వీరి వివాహ వేడుక కుటుంబ సభ్యులు, సన్నిహితుల సమక్షంలో ఘనంగా జరిగింది. అయితే ఈ పెళ్లిలో అనుసరించిన ప్రత్యేక సంప్రదాయాలు ప్రస్తుతం చర్చనీయాంశంగా మారాయి. ముఖ్యంగా అనిరుధ్.. కావ్య మెడలో గొలుసు వేస్తున్న ఫొటో బయటకు రావడంతో వీరిది స్వాభిమానం వివాహమా అనే సందేహాలు వ్యక్తమయ్యాయి. ఈ నేపథ్యంలో డీఎంకే ఐటీ విభాగం కార్యదర్శి డాక్టర్ టీఆర్‌బీ రాజా స్పందిస్తూ, అనిరుధ్-కావ్య స్వాభిమానం వివాహ పద్ధతిలో ఒక్కటయ్యారని వెల్లడించారు. పెళ్లిలో ఇద్దరూ పూలమాలలు, గొలుసులు మార్చుకున్నారని, కుటుంబ సభ్యులు, స్నేహితులు వారిని ఆశీర్వదించారని తెలిపారు.

తమిళనాడులో సామాజిక సంస్కర్త పెరియార్ ఈవీ రామసామి ప్రారంభించిన స్వాభిమానం ఉద్యమం నుంచి ఈ వివాహ సంప్రదాయం ఆవిర్భవించింది. కుల వివక్ష, సంప్రదాయ వివాహాల్లో మతపెద్దల ఆధిపత్యం వంటి అంశాలను ప్రశ్నిస్తూ ఈ విధానం ప్రాచుర్యంలోకి వచ్చింది. ఇందులో వధూవరులు పరస్పరం జీవిత భాగస్వాములుగా అంగీకరించి, పూలమాలలు లేదా ఉంగరాలు మార్చుకుంటూ తమ నిబద్ధతను ప్రకటిస్తారు. పురోహితుడు లేదా విస్తృతమైన మతపరమైన క్రతువులు తప్పనిసరి కావు. తమిళనాడులో హిందూ వివాహ చట్టానికి చేసిన ప్రత్యేక సవరణ ద్వారా ఈ పద్ధతికి చట్టబద్ధమైన గుర్తింపు లభించింది. ఈ సంప్రదాయాన్ని అనుసరించినట్లు రాజా వెల్లడించడంతో అనిరుధ్, కావ్యల వివాహం మరోసారి వార్తల్లో నిలిచింది.