దసరా ఉత్సవాల నిర్వహణపై సీఎం చంద్రబాబు కీలక ఆదేశాలు

ముఖ్యమంత్రి చంద్రబాబు విజయవాడలో శరన్నవరాత్రి ఉత్సవాలు, విజయవాడ ఉత్సవ్‌ 2.0, జాతీయ సరస్‌ మేళా నిర్వహణపై మంత్రులు, వివిధ శాఖల అధికారులతో సమీక్ష నిర్వహించారు. ఇంద్రకీలాద్రిపై ఉత్సవాలను విజయవంతంగా నిర్వహించాలని, సరస్‌ మేళా దేశానికే ఆదర్శంగా నిలవాలని సూచించారు. వేడుకల్లో సంప్రదాయంతో పాటు ఉత్సాహభరితమైన కార్యక్రమాలకు ప్రాధాన్యం ఇవ్వాలని, దేవాదాయ, పర్యాటక శాఖలు, జిల్లా యంత్రాంగం సమన్వయంతో పనిచేయాలని ఆదేశించారు. గిరిజన ప్రాంతాల్లో రహదారుల నిర్మాణం ద్వారా డోలీ మోతల సమస్యను తొలగించేందుకు ‘అడవి తల్లి బాట’ కార్యక్రమాన్ని ముందుకు తీసుకెళ్తున్న ఉపముఖ్యమంత్రి పవన్‌ కల్యాణ్‌ను అభినందించారు. ఈ కార్యక్రమం తొలి దశ విజయవంతమైందని, 1,976 కిలోమీటర్ల రహదారుల నిర్మాణానికి శ్రీకారం చుట్టడం గిరిజనుల కష్టాలను తగ్గించడంలో కీలకమని పేర్కొన్నారు.

మరోవైపు, జాఫర్‌ సాహెబ్‌ కెనాల్‌ ప్రాంతంలో ప్రభుత్వ స్థలాల్లో నివసిస్తున్న అర్హులకు ఇళ్ల పట్టాలు పంపిణీ చేయాలని ప్రభుత్వం నిర్ణయించినట్లు చంద్రబాబు తెలిపారు. పేదలకు శాశ్వత ఇళ్ల పట్టాలు అందించడం ద్వారా భద్రత, ఆత్మగౌరవం, ఆస్తి కల్పించడమే తమ లక్ష్యమన్నారు. ఇప్పటికే విశాఖపట్నం, విజయవాడ, మంగళగిరిలో పట్టాలు పంపిణీ చేశామని, సంక్రాంతికి నెల్లూరులో మరో 4 వేల మందికి అందిస్తామని చెప్పారు. ప్రతి ఇంటికీ కుళాయి కనెక్షన్‌ కోసం రూ.30 వేల కోట్లు, పట్టణాలు, గ్రామాల్లో మౌలిక వసతుల కోసం రూ.1.8 లక్షల కోట్లు ఖర్చు చేస్తున్నట్లు వివరించారు. భూ సమస్యలకు శాశ్వత పరిష్కారం చూపాలని కలెక్టర్లను ఆదేశించినట్లు తెలిపారు. స్థానిక సంస్థల ఎన్నికల అనంతరం రాష్ట్రంలో కేంద్ర, రాష్ట్ర, స్థానిక ప్రభుత్వాల సమన్వయంతో ట్రిపుల్‌ ఇంజిన్‌ పాలన ఏర్పడుతుందని పేర్కొంటూ, నీతి, నిజాయతీతో పనిచేసే నాయకులను ఎన్నుకోవాలని ప్రజలకు పిలుపునిచ్చారు.