

డాక్టర్ బీఆర్ అంబేద్కర్ కోనసీమ జిల్లా రాజోలు నియోజకవర్గంలోని మామిడికుదురు మండలం నగరం గ్రామ పరిధిలో తాడివారిమెరక వద్ద ఉన్న ఓఎన్జీసీ గ్యాస్ డ్రిల్లింగ్ బావి నుంచి మంగళవారం తెల్లవారుజామున భారీగా గ్యాస్ లీకైంది. ఉదయం సుమారు 4.30 గంటల సమయంలో పెద్ద శబ్దంతో గ్యాస్ ఒక్కసారిగా వెలువడినట్లు అధికారులు తెలిపారు. ఈ ఘటనపై ముఖ్యమంత్రి చంద్రబాబు నాయుడు అధికారులతో మాట్లాడి పరిస్థితిని సమీక్షించారు. గ్యాస్ ప్రభావిత ప్రాంతాల్లోని ప్రజలను వెంటనే సురక్షిత ప్రాంతాలకు తరలించాలని ఆదేశించారు. ఇప్పటికే బావి చుట్టూ కిలోమీటరు పరిధిలో ఉన్న నివాస ప్రాంతాలను ఖాళీ చేయించారు.
ప్రజల భద్రతకు అత్యంత ప్రాధాన్యం ఇవ్వాలని, ఓఎన్జీసీ ప్రత్యేక సాంకేతిక బృందాలతో లీకేజీని అరికట్టేందుకు తక్షణ చర్యలు చేపట్టాలని సీఎం సూచించారు. ఓఎన్జీసీ ఛైర్మన్తో పాటు ఉన్నతాధికారులతో సమన్వయం చేసుకోవాలని ఆదేశించారు. భూమికి సమీపంలో గ్యాస్ వ్యాపించకుండా సిబ్బంది చర్యలు తీసుకుంటున్నారు. ముందస్తు జాగ్రత్తగా డీజిల్ జనరేటర్లు, ఇతర పరికరాలను నిలిపివేశారు. ఇప్పటివరకు మంటలు చెలరేగలేదని, బావి ముఖద్వారం పటిష్టంగానే ఉందని ఓఎన్జీసీ అధికారులు వెల్లడించారు. లీకేజీని పూర్తిగా అరికట్టేందుకు సిమెంటింగ్ బృందం కూడా ఘటనా స్థలానికి చేరుకుంటోంది. మరో నాలుగైదు గంటల్లో పరిస్థితిని అదుపులోకి తీసుకురాగలమని అధికారులు అంచనా వేస్తున్నారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!