ఏఐ దుర్వినియోగం, డీప్‌ఫేక్‌లపై అమిత్ షాకు చిరంజీవి విజ్ఞప్తి

కళాకారులను లక్ష్యంగా చేసుకుని కృత్రిమ మేధ (ఏఐ) సాయంతో అసభ్యకరమైన, మార్ఫింగ్ చేసిన వీడియోలు రూపొందించడంపై మెగాస్టార్ చిరంజీవి ఆందోళన వ్యక్తం చేశారు. ఈ సమస్యకు అడ్డుకట్ట వేయాలని కోరుతూ కేంద్ర హోంమంత్రి అమిత్ షాను హైదరాబాద్‌లో కలిసి పరిస్థితిని వివరించారు. ఈ భేటీలో చిరంజీవితో పాటు ఆయన తనయుడు, నటుడు రామ్ చరణ్ కూడా పాల్గొన్నారు. ఇటీవల ఎక్స్ వేదికగా డీప్‌ఫేక్ వీడియోలపై తన ఆందోళనను వ్యక్తం చేసిన చిరంజీవి, ఈ సమస్య పరిష్కారానికి తదుపరి అడుగుగా కేంద్ర హోంమంత్రిని కలిశారు.

ఏఐ, డీప్‌ఫేక్ టెక్నాలజీల దుర్వినియోగం వల్ల కళాకారుల వ్యక్తిగత గౌరవం, హక్కులు, సృజనాత్మక కంటెంట్‌కు ముప్పు ఏర్పడుతోందని చిరంజీవి వివరించినట్లు సమాచారం. ఇలాంటి చర్యలను అరికట్టేందుకు మరింత పటిష్టమైన రక్షణ చర్యలు తీసుకోవడంతో పాటు, బాధ్యులపై కఠిన శిక్షలు విధించాలని కోరారు. చిరంజీవి ఆందోళనలను పరిగణనలోకి తీసుకున్న అమిత్ షా, ఈ అంశాన్ని ప్రభుత్వం పరిశీలిస్తుందని హామీ ఇచ్చినట్లు వెల్లడైంది. ఈ సమస్యపై లిఖితపూర్వకంగా వినతిపత్రం సమర్పించాలని సూచించడంతో పాటు, వ్యవహారాన్ని సమన్వయం చేసే బాధ్యతను జి. కిషన్ రెడ్డికి అప్పగించినట్లు సమాచారం. కేంద్ర హోంమంత్రి స్పందనపై చిరంజీవి కృతజ్ఞతలు తెలిపారు.