బొగ్గు నాణ్యతపై సీఎం తప్పుడు ప్రచారం చేస్తున్నారు - జగదీశ్‌రెడ్డి

తెలంగాణలో విద్యుత్‌ సరఫరా పరిస్థితిపై బీఆర్‌ఎస్‌ నాయకులు ఆందోళన వ్యక్తం చేశారు. పార్టీ వర్కింగ్‌ ప్రెసిడెంట్‌ కేటీఆర్‌ పిలుపు మేరకు గురువారం ఆరు బృందాలు యాదాద్రి, జైపూర్‌, కొత్తగూడెం, మణుగూరు, భూపాలపల్లి థర్మల్‌ విద్యుత్‌ కేంద్రాలతో పాటు హైదరాబాద్‌లోని సింగరేణి భవన్‌ను సందర్శించాయి. బొగ్గు నిల్వలు, విద్యుదుత్పత్తి సామర్థ్యం, యూనిట్ల పనితీరుపై వివరాలు తెలుసుకునేందుకు ప్రయత్నించాయి. కొన్ని కేంద్రాల్లో బీఆర్‌ఎస్‌ నాయకులను పోలీసులు అడ్డుకోవడంతో వాగ్వాదం, ఉద్రిక్త పరిస్థితులు చోటుచేసుకున్నాయి.

సింగరేణిలో బొగ్గు ఉత్పత్తి, నిల్వలు, సరఫరాపై బీఆర్‌ఎస్‌ నేతలు పలు ఆరోపణలు చేశారు. సుమారు 40 లక్షల టన్నుల బొగ్గు లెక్కల్లో తేడా ఉందని, దీనిపై సమగ్ర దర్యాప్తు జరపాలని పార్టీ డిమాండ్‌ చేసింది. సింగరేణి భవన్‌లో పార్టీ ఫ్యాక్ట్‌ ఫైండింగ్‌ కమిటీ అధికారులు, యాజమాన్యానికి వినతిపత్రం అందజేసింది. మరోవైపు, యాదాద్రి ప్లాంట్‌లో పూర్తి స్థాయి విద్యుదుత్పత్తి పునరుద్ధరణకు చర్యలు తీసుకోవాలని రాష్ట్ర ప్రభుత్వం ఇప్పటికే అధికారులను ఆదేశించింది. బొగ్గు లభ్యత, గ్రేడ్‌ తదితర అంశాలపై కేంద్రం నుంచి సరఫరా పొందేందుకు చర్యలు చేపట్టాలని సూచించింది.