జగదీశ్‌రెడ్డి ఫాంహౌస్‌లో ఇనాం భూములున్నాయంటూ కాంగ్రెస్‌ ఆరోపణలు

తెలంగాణలో గత బీఆర్‌ఎస్‌ పాలనలో ప్రభుత్వ, అసైన్డ్‌, ఇనాం భూములు, జలవనరుల ఆక్రమణలపై సీఎం రేవంత్‌రెడ్డి అసెంబ్లీలో వివరాలు వెల్లడించారని కాంగ్రెస్‌ ప్రజాప్రతినిధుల బృందం సభ్యులు, ఎంపీ చామల కిరణ్‌కుమార్‌రెడ్డి, ప్రభుత్వ విప్‌ ఆది శ్రీనివాస్‌ అన్నారు. బీఆర్‌ఎస్‌ నేతలు, వారి కుటుంబ సభ్యులకు సంబంధించిన భూ వ్యవహారాలను ప్రజల ముందుకు తీసుకురావడానికే నిజనిర్ధారణ యాత్ర చేపట్టామని తెలిపారు. సోమవారం రంగారెడ్డి జిల్లా షాబాద్‌ మండలం మద్దూరులో మాజీ మంత్రి, సూర్యాపేట ఎమ్మెల్యే జి.జగదీశ్‌రెడ్డికి చెందినదిగా పేర్కొంటున్న ఫాంహౌస్‌ ప్రాంతాన్ని ఎంపీలు, ఎమ్మెల్యేలు, ఎమ్మెల్సీలతో కలిసి పరిశీలించారు. మద్దూరులోని రెండు సర్వే నంబర్ల పరిధిలో 50 ఎకరాల భూమి ఉండగా, అందులో సుమారు 12 ఎకరాలు ఇనాం భూమి ఉన్నట్లు కాంగ్రెస్‌ నేతలు ఆరోపించారు. జలవనరుల ఆక్రమణకు కూడా పాల్పడ్డారని వారు ఆరోపించారు.

జగదీశ్‌రెడ్డి 2009 ఎన్నికల సమయంలో తన ఆస్తులను రూ.12 లక్షలుగా అఫిడవిట్‌లో చూపించారని, 2014, 2018, 2023 ఎన్నికల నాటికి ఆస్తులు భారీగా పెరిగాయని చామల కిరణ్‌కుమార్‌రెడ్డి ప్రశ్నించారు. మద్దూరులో 50 ఎకరాల ఫాంహౌస్‌ ఎలా ఏర్పడిందో విచారణ జరపాలని, ఇనాం భూములు ఉంటే వాటిని స్వాధీనం చేసుకుని అర్హులకు అందించాలని కలెక్టర్‌ను కోరారు. తుంగతుర్తి ఎమ్మెల్యే మందుల సామేల్‌, షాద్‌నగర్‌ ఎమ్మెల్యే వీర్లపల్లి శంకర్‌ కూడా జగదీశ్‌రెడ్డికి సంబంధించిన భూములపై పలు ఆరోపణలు చేశారు. కాంగ్రెస్‌ బృందంలో ఎంపీలు బలరాం నాయక్‌, సురేశ్‌ షెట్కార్‌, ఎమ్మెల్యేలు నవీన్‌యాదవ్‌, బీర్ల ఐలయ్య, బత్తుల లక్ష్మారెడ్డి, కుంభం అనిల్‌కుమార్‌రెడ్డి, ఎమ్మెల్సీలు అద్దంకి దయాకర్‌, బల్మూరి వెంకట్‌ తదితరులు పాల్గొన్నారు.