అన్ని పౌర సేవల బిల్లులకు క్యూర్‌1 యాప్

ప్రజలు వివిధ పౌర సేవలకు సంబంధించిన బిల్లులను ఒకే వేదికపై చెల్లించేందుకు తెలంగాణ ప్రభుత్వం క్యూర్‌1 అనే కొత్త మొబైల్‌ అనువర్తనాన్ని అందుబాటులోకి తీసుకొచ్చింది. ఇది ప్రధాన నగర ప్రాంత ఆర్థిక పరిధిలోని గ్రేటర్‌ హైదరాబాద్‌, మల్కాజిగిరి, సైబరాబాద్‌ ప్రాంతాల ప్రజలకు ఉపయోగపడనుంది. ఆస్తి పన్ను, విద్యుత్‌ బిల్లులు, నీటి సరఫరా, మురుగునీటి సదుపాయాల చార్జీలు, ట్రాఫిక్‌ జరిమానాలు, వ్యాపార అనుమతి రుసుములు వంటి చెల్లింపులను ఒకేచోట చేయవచ్చు.

ఉప్పల్‌ భగాయత్‌లో నిర్వహించిన కార్యక్రమంలో ముఖ్యమంత్రి రేవంత్‌ రెడ్డి ఈ అనువర్తనాన్ని ప్రారంభించారు. “ఒకే ప్రాంతం, ఒకే అనువర్తనం, అన్ని చెల్లింపులు” అనే నినాదంతో దీనిని రూపొందించారు. ప్రజలు తమ మొబైల్‌ నంబరుతో నమోదు చేసుకుని, సేవా సంఖ్యలను జతచేసి అన్ని బిల్లులను సులభంగా చెల్లించవచ్చు. భవిష్యత్తులో మరిన్ని ప్రభుత్వ సేవలను కూడా ఇందులో అందుబాటులోకి తీసుకురానున్నారు.