బంగాళాఖాతంలో బలపడుతున్న మురసు తుఫాన్‌.. ఏపీకి భారీ వర్ష సూచన

బంగాళాఖాతంలో ఏర్పడిన అల్పపీడనం క్రమంగా బలపడుతూ వాయుగుండంగా మారింది. ప్రస్తుతం ఇది చెన్నైకి సుమారు 1,140 కిలోమీటర్లు, మచిలీపట్నానికి 1,200 కిలోమీటర్ల దూరంలో కేంద్రీకృతమై ఉంది. రాగల 12 గంటల్లో తీవ్ర వాయుగుండంగా బలపడే అవకాశం ఉందని వాతావరణ శాఖ అంచనా వేస్తోంది. అనంతరం తుఫాన్‌గా మారే సూచనలు ఉన్నాయని తెలిపింది. ఈ తుఫాన్‌కు ‘మురసు’ అని నామకరణం చేశారు. నవంబర్‌ 2 నాటికి ఇది ఏపీ తీరానికి సమీపంలోకి చేరుకునే అవకాశం ఉంది.

తుఫాన్‌ ప్రభావంతో సోమ, మంగళవారాల్లో ఆంధ్రప్రదేశ్‌లో భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. ముఖ్యంగా సెంట్రల్‌ ఆంధ్రా, రాయలసీమ ప్రాంతాల్లో భారీ వర్షాలు, పలు జిల్లాల్లో అతిభారీ వర్షాలు కురిసే సూచనలు ఉన్నాయి. తుఫాన్‌ సోమవారం సాయంత్రానికి ఏపీ తీరానికి చేరుకునే అవకాశం ఉందని అంచనా వేస్తున్నారు. ఈ నేపథ్యంలో లోతట్టు ప్రాంతాల ప్రజలు అప్రమత్తంగా ఉండాలని, అవసరమైన జాగ్రత్తలు తీసుకోవాలని అధికారులు సూచించారు.