తెలంగాణకు ఎల్‌నినో గండం.. వరి సాగు వాయిదా వేసుకోండి: సీఎం రేవంత్‌రెడ్డి

తెలంగాణలో ఎల్‌నినో ప్రభావంతో రానున్న రోజుల్లో నీరు, విద్యుత్ కొరత తీవ్రరూపం దాల్చే అవకాశం ఉందని ముఖ్యమంత్రి రేవంత్‌రెడ్డి హెచ్చరించారు. ఎల్‌నినో పరిస్థితులపై మంత్రులతో సమీక్షించిన అనంతరం ఆయన మీడియాతో మాట్లాడుతూ ప్రజలు, రైతులు అప్రమత్తంగా ఉండాలని సూచించారు. గతేడాది ఇదే సమయానికి రాష్ట్రంలోని రిజర్వాయర్లలో 400 టీఎంసీలకు పైగా నీరు అందుబాటులో ఉండగా, ప్రస్తుతం 209 టీఎంసీలు మాత్రమే ఉన్నాయని తెలిపారు. వచ్చే ఎనిమిది నెలలు కీలకమని, అందుబాటులో ఉన్న నీటిని పొదుపుగా వినియోగించుకోవాలని కోరారు. హైదరాబాద్‌కు తాగునీరు అందించే జలాశయాల్లోనూ నీటి నిల్వలు తగ్గుతున్న నేపథ్యంలో యాసంగిలో వరి సాగును వాయిదా వేసుకుని, ఆరుతడి పంటలకే ప్రాధాన్యం ఇవ్వాలని రైతులకు విజ్ఞప్తి చేశారు.

ఎండల తీవ్రత కారణంగా విద్యుత్ వినియోగం సగటుతో పోలిస్తే అదనంగా 5 వేల మెగావాట్లు పెరిగిందని సీఎం వెల్లడించారు. రాష్ట్రానికి అదనపు విద్యుత్ కేటాయించాలని, విద్యుత్ సబ్సిడీలను పెంచాలని కేంద్ర ప్రభుత్వాన్ని కోరినట్లు తెలిపారు. ఎల్‌నినో ప్రభావంతో ఎదురయ్యే సవాళ్లను అధిగమించేందుకు కేబినెట్ సబ్‌కమిటీని ఏర్పాటు చేయనున్నట్లు చెప్పారు. దసరా తర్వాత ఉపముఖ్యమంత్రి భట్టి విక్రమార్క నేతృత్వంలో అఖిలపక్ష సమావేశం నిర్వహిస్తామని వెల్లడించారు. కేంద్రం నుంచి అధిక నిధులు సాధించేలా కార్యాచరణ రూపొందించాలని అధికారులను ఆదేశించినట్లు తెలిపారు. ప్రకృతి విపత్తు వంటి పరిస్థితులను ఎదుర్కొనేందుకు విపక్షాలు సహా అందరూ రాజకీయాలకు అతీతంగా ప్రభుత్వానికి సహకరించాలని, దుష్ప్రచారాలను నమ్మకుండా సంయమనం పాటించాలని రేవంత్‌రెడ్డి కోరారు.