తుఫాను ముప్పుతో శ్రీకాకుళంలో హై అలర్ట్

తుఫాన్ ప్రభావం నేపథ్యంలో శ్రీకాకుళం జిల్లాలో అధికారులు అప్రమత్తమయ్యారు. భారీ వర్షాల నేపథ్యంలో పాఠశాలలు, అంగన్వాడీ కేంద్రాలకు సెలవులు ప్రకటించినట్లు జిల్లా యంత్రాంగం తెలిపింది. స్థానిక పరిస్థితులకు అనుగుణంగా నిర్ణయాలు తీసుకోవాలని మండల విద్యాశాఖ అధికారులను ఆదేశించారు. జిల్లాలో ఇప్పటికే ముసురు వాతావరణం నెలకొనగా, మధ్యాహ్నం తర్వాత వర్షాల తీవ్రత పెరిగే అవకాశం ఉందని అధికారులు పేర్కొన్నారు. శ్రీకాకుళం జిల్లాకు భారీ వర్షాల సూచన నేపథ్యంలో కంట్రోల్ రూమ్ ఏర్పాటు చేసి, అత్యవసర పరిస్థితుల్లో ప్రజలకు సత్వర సహాయం అందేలా చర్యలు చేపట్టినట్లు తాజా నివేదికలు వెల్లడించాయి.

వర్షాల పరిస్థితిపై మంత్రి కింజరాపు అచ్చెన్నాయుడు జిల్లా కలెక్టర్ స్వప్నిల్ దినకర్ పుండ్కర్, ఎస్పీతో పాటు వివిధ శాఖల అధికారులతో సమీక్షించారు. ఇరిగేషన్, రెవెన్యూ, విద్యుత్ శాఖల అధికారులు అప్రమత్తంగా ఉండాలని ఆదేశించారు. తీర ప్రాంత గ్రామాలు, నదీ పరివాహక ప్రాంతాల్లోని ప్రజలను అప్రమత్తం చేయాలని, లోతట్టు ప్రాంతాల ప్రజలను అవసరమైతే సురక్షిత ప్రాంతాలకు తరలించాలని సూచించారు. ప్రజలు చెట్ల కింద, శిథిలావస్థలో ఉన్న భవనాలు, హోర్డింగ్స్ వద్ద ఉండకుండా జాగ్రత్తలు తీసుకోవాలని సూచించారు. అన్ని శాఖల అధికారులు సమన్వయంతో పనిచేసి ప్రాణ, ఆస్తి నష్టం జరగకుండా ముందస్తు చర్యలు చేపట్టాలని ఆదేశించారు.