ఐఐటీ బాంబేలో విద్యార్థి ఆత్మహత్య.. పరీక్షలో ఫోన్ వాడిన ఘటనపై వివాదం

ఐఐటీ బాంబేలో ఓ విద్యార్థి ఆత్మహత్య చేసుకున్న ఘటన క్యాంపస్‌లో తీవ్ర ఆందోళనకు దారితీసింది. అందుబాటులో ఉన్న సమాచారం ప్రకారం, పరీక్ష సమయంలో సదరు విద్యార్థి మొబైల్ ఫోన్ ఉపయోగిస్తూ పట్టుబడ్డాడు. అలాగే ప్రశ్నపత్రాన్ని ChatGPTలో అప్‌లోడ్ చేసినట్లు సమాచారం. ఈ ఘటన అనంతరం ఓ ప్రొఫెసర్ విద్యార్థికి కౌన్సెలింగ్ ఇచ్చినట్లు తెలుస్తోంది. అయితే విద్యార్థిపై ఎలాంటి క్రమశిక్షణా చర్యలు తీసుకోలేదని ఐఐటీ బాంబే వెల్లడించింది.

విద్యార్థి మృతిపై ఐఐటీ బాంబేలో నిరసనలు వ్యక్తమయ్యాయి. ఈ వ్యవహారంలో సంస్థ జవాబుదారీతనం, నిర్ణయ ప్రక్రియలో పారదర్శకత పాటించాలంటూ విద్యార్థులు డిమాండ్ చేసినట్లు సమాచారం. పరీక్షల్లో అక్రమాలకు సంబంధించిన అంశాలను పరిశీలించడంతో పాటు, ఒత్తిడి లేదా మానసిక ఇబ్బందులు ఎదుర్కొనే విద్యార్థులకు తగిన సహాయం అందించాల్సిన అవసరంపై కూడా చర్చ జరుగుతోంది. ఘటనకు సంబంధించిన పూర్తి వివరాలు, సంస్థ తదుపరి చర్యలు అధికారికంగా వెల్లడించాల్సి ఉంది.