దసరా వేళ ఇంద్రకీలాద్రి ఘాట్ రోడ్డుకు బ్రేక్

దసరా ఉత్సవాల నేపథ్యంలో ఇంద్రకీలాద్రి ఘాట్ రోడ్డులో మరమ్మతు పనులు చేపట్టనున్నారు. ఈ నెల 22వ తేదీ ఉదయం నుంచి ఘాట్ రోడ్డును పూర్తిగా మూసివేస్తున్నట్లు దుర్గగుడి ఈవో వి.కె. శీనా నాయక్ తెలిపారు. వారం రోజుల పాటు ఈ మార్గంలో వాహనాల రాకపోకలకు అనుమతి ఉండదని, భక్తులు శ్రీ కనకదుర్గానగర్ మార్గం ద్వారా ఆలయానికి చేరుకోవాలని సూచించారు. హైదరాబాద్ వైపు నుంచి వచ్చే భక్తుల కోసం పున్నమి ఘాట్ వద్ద పార్కింగ్ సౌకర్యం ఏర్పాటు చేసినట్లు తెలిపారు. పున్నమి ఘాట్ నుంచి ఆలయం వరకు ఉచిత బస్సు సౌకర్యం అందుబాటులో ఉంటుందని చెప్పారు.

విశాఖపట్నం, చెన్నై తదితర ప్రాంతాల నుంచి వన్‌టౌన్ వైపు వచ్చే భక్తుల కోసం సీతమ్మ వారి పాదాల వద్ద పార్కింగ్ సౌకర్యం కల్పించినట్లు ఈవో తెలిపారు. అక్కడి నుంచి ఆలయం వరకు ఉచిత బస్సు సౌకర్యాన్ని కూడా ఏర్పాటు చేశామని చెప్పారు. భక్తుల సౌకర్యార్థం పార్కింగ్ ప్రాంతాల నుంచి దేవస్థానం వరకు ఉచిత రవాణా సదుపాయం అందుబాటులో ఉంటుందని, భక్తులు ఈ సదుపాయాన్ని వినియోగించుకోవాలని శీనా నాయక్ సూచించారు.