తుఫాన్ బాధిత రైతులకు అండగా ఉంటాం - చంద్రబాబు భరోసా

తుఫాన్ ప్రభావంతో పంటలు నష్టపోయిన రైతులకు ప్రభుత్వం అండగా ఉంటుందని, ఎవరూ అధైర్యపడవద్దని ఆంధ్రప్రదేశ్ ముఖ్యమంత్రి నారా చంద్రబాబు నాయుడు భరోసా ఇచ్చారు. శుక్రవారం ఆయన బాపట్ల జిల్లాలోని తుఫాన్ ప్రభావిత ప్రాంతాల్లో పర్యటించి, జిల్లెళ్లమూడిలో నీట మునిగిన వరి పొలాలను పరిశీలించారు. పంట నష్టపోయిన రైతులతో మాట్లాడి వారికి ధైర్యం చెప్పారు. పంటల సాగు కోసం ఎంత పెట్టుబడి పెట్టారని అడిగి తెలుసుకున్నారు. కరవు పరిస్థితుల్లోనూ కూటమి ప్రభుత్వం నీరు అందించి పంటలను కాపాడిందని, అయితే పంట చేతికి వచ్చే సమయంలో తుఫాన్ కారణంగా నష్టం జరిగిందని రైతులు సీఎంకు వివరించారు. ఈ సందర్భంగా రైతులు పంటల బీమా చేయించుకున్నారా అని చంద్రబాబు అడిగి తెలుసుకున్నారు.

ప్రకృతి విపత్తుల సమయంలో పంటల బీమాతో పాటు ప్రభుత్వం అందించే ఇన్‌పుట్ సబ్సిడీ రైతులకు అండగా నిలుస్తాయని ముఖ్యమంత్రి తెలిపారు. పంటల బీమా వల్ల కలిగే ప్రయోజనాలపై రైతుల్లో పెద్దఎత్తున అవగాహన కల్పిస్తామని చెప్పారు. అనంతరం జిల్లెళ్లమూడి వంతెన వద్ద వరద ప్రవాహాన్ని పరిశీలించారు. వాగు ఉధృతి కారణంగా పలు ప్రాంతాలు నీట మునిగాయని అధికారులు, మంత్రి కొలుసు పార్థసారథి, స్థానిక ప్రజాప్రతినిధులు సీఎంకు వివరించారు. ఈ సందర్భంగా జిల్లెళ్లమూడి అమ్మ భక్తులు ముఖ్యమంత్రిని కలిశారు. వారు అందిస్తున్న సేవలను చంద్రబాబు అభినందించారు.