ప్రభుత్వ సంక్షేమ పథకాల ప్రచారానికి సీఎం విజయ్‌..

తమిళనాడు ముఖ్యమంత్రి విజయ్‌ మరోసారి కెమెరా ముందుకు రానున్నట్లు వార్తలు వస్తున్నాయి. రాష్ట్ర ప్రభుత్వ సంక్షేమ పథకాలను మరింత విస్తృతంగా ప్రజల్లోకి తీసుకెళ్లేందుకు టీవీకే ప్రభుత్వం ప్రత్యేక ప్రచార కార్యక్రమానికి సిద్ధమవుతున్నట్లు సమాచారం. సాధారణంగా ప్రభుత్వాలు ఇలాంటి ప్రచారాల కోసం బ్రాండ్‌ అంబాసిడర్లను లేదా సినీ ప్రముఖులను ఎంపిక చేసుకుంటాయి. అయితే విజయ్‌ కంటే పెద్ద స్టార్‌ ఎవరుంటారని భావించిందో ఏమో.. ఈసారి ఆయన్నే ప్రచారకర్తగా చూపించాలని ప్రభుత్వం నిర్ణయించినట్లు తెలుస్తోంది. ఈ భారీ యాడ్‌కు స్టార్‌ డైరెక్టర్‌ గౌతమ్‌ మేనన్‌ దర్శకత్వం వహించనున్నారని, సినిమా స్థాయిలో నిర్మించేందుకు భారీ బడ్జెట్‌ కేటాయించినట్లు సమాచారం.

అయితే ముఖ్యమంత్రిగా, టీవీకే అధినేతగా విజయ్‌ నిర్వహిస్తున్న బాధ్యతల నేపథ్యంలో యాడ్‌ షూటింగ్‌ వెంటనే ప్రారంభం కాకపోవచ్చని తెలుస్తోంది. ఉప ఎన్నికలు పూర్తయిన తర్వాత చిత్రీకరణ చేపట్టే అవకాశముందని సమాచారం. రాష్ట్రంలో ఖాళీగా ఉన్న ఏడు అసెంబ్లీ స్థానాల్లో మధురాంతకం, ధారాపురం నియోజకవర్గాలకు ఇటీవల ఉప ఎన్నికలు జరగ్గా.. ఈ రెండు చోట్లా టీవీకే విజయం సాధించింది. తిరుచ్చి ఈస్ట్‌, పెరుంతురై, అంబాసముద్రం, విరాలిమలై, కరూర్‌ స్థానాలకు ఎన్నికలు జరగాల్సి ఉంది. దీపావళి తర్వాత ఈ ఉప ఎన్నికలు నిర్వహించేందుకు ఎన్నికల సంఘం ఏర్పాట్లు చేస్తున్నట్లు తెలుస్తోంది. విజయ్‌ యాడ్‌లో కనిపించనున్నారనే వార్తతో ఆయన అభిమానుల్లో ఆసక్తి నెలకొంది. ముఖ్యమంత్రి అయిన తర్వాత ఆయన నటించిన చివరి చిత్రం ‘జన నాయగన్’ విడుదల కావాల్సి ఉంది.