షమీ నెక్స్ట్ ఇన్నింగ్స్ రాజకీయాల్లోనా?

టీమిండియా ఫాస్ట్ బౌలర్ మహ్మద్ షమీ రాజకీయాల్లోకి అడుగుపెట్టనున్నారనే చర్చ మొదలైంది. రాష్ట్రీయ లోక్‌దళ్ (RLD) అధినేత, కేంద్ర మంత్రి జయంత్ చౌదరీతో షమీ భేటీ కావడంతో ఉత్తరప్రదేశ్‌లో ఈ ఊహాగానాలు ఊపందుకున్నాయి. 2027 యూపీ అసెంబ్లీ ఎన్నికల్లో అమ్రోహా నియోజకవర్గం నుంచి షమీ పోటీ చేసే అవకాశం ఉందంటూ పలు కథనాలు వెలువడ్డాయి.

అయితే షమీ రాజకీయ ప్రవేశంపై ఇప్పటివరకు ఎలాంటి అధికారిక ప్రకటన వెలువడలేదు. షమీ స్వయంగా పోటీ చేస్తారా? లేదా ఆయన కుటుంబ సభ్యుల్లో ఎవరైనా ఎన్నికల బరిలో దిగుతారా? అనే అంశంపై కూడా భిన్నమైన కథనాలు ఉన్నాయి. ప్రస్తుతం షమీ లేదా ఆర్‌ఎల్‌డీ నుంచి ఎన్నికల్లో పోటీ చేసే విషయంపై అధికారిక ధ్రువీకరణ లేదు. జయంత్ చౌదరీతో జరిగిన భేటీ నేపథ్యంలోనే ఈ చర్చ మొదలైనట్లు తెలుస్తోంది.