కేబీఆర్‌ పార్క్ వద్ద వన్‌వేతో భారీ ట్రాఫిక్ జామ్

హైదరాబాద్‌లోని కేబీఆర్‌ పార్క్ చుట్టూ ట్రాఫిక్ ఫ్రీ ప్రాజెక్టులో భాగంగా ఇవాళ్టి నుంచి వన్‌వే విధానాన్ని అమలు చేస్తున్నారు. అయితే కొత్త ట్రాఫిక్ నిబంధనలపై వాహనదారులకు పూర్తిస్థాయిలో అవగాహన లేకపోవడంతో ఉదయం నుంచే పరిసర రహదారుల్లో భారీగా ట్రాఫిక్ జామ్ ఏర్పడింది. ముఖ్యంగా ప్రధాన రహదారి అయిన రోడ్ నంబర్ 12లో సుమారు కిలోమీటర్ మేర వాహనాలు నిలిచిపోయాయి.

ట్రాఫిక్ రద్దీ కారణంగా ఉద్యోగులు కార్యాలయాలకు ఆలస్యంగా చేరుకుంటున్నారు. కొత్త వన్‌వే నిబంధనలపై వాహనదారులకు అవగాహన కల్పించడంతో పాటు ట్రాఫిక్‌ను క్రమబద్ధీకరించేందుకు పోలీసులు తీవ్రంగా శ్రమిస్తున్నారు. వాహనదారులు కొత్త మార్గాలను గమనించి పోలీసులకు సహకరించాలని అధికారులు సూచిస్తున్నారు.