విజయవాడ దుర్గమ్మ దర్శనానికి రాష్ట్రపతి ద్రౌపది ముర్ము

విజయవాడ ఇంద్రకీలాద్రిపై కొలువైన శ్రీ దుర్గా మల్లేశ్వర స్వామివారి దేవస్థానంలో దసరా శరన్నవరాత్రి మహోత్సవాలు భక్తిశ్రద్ధలతో కొనసాగుతున్నాయి. అక్టోబర్ 11న ప్రారంభమైన ఉత్సవాలకు రాష్ట్రంలోని వివిధ ప్రాంతాలతో పాటు ఇతర ప్రాంతాల నుంచి కూడా పెద్ద సంఖ్యలో భక్తులు తరలివస్తున్నారు. భక్తులకు సౌకర్యవంతమైన దర్శనం కల్పించేందుకు దేవస్థానం అధికారులు, జిల్లా యంత్రాంగం సమన్వయంతో ఏర్పాట్లు చేస్తున్నారు.

ఉత్సవాల్లో నాలుగో రోజైన అక్టోబర్ 14న భారత రాష్ట్రపతి ద్రౌపది ముర్ము ఇంద్రకీలాద్రిపై అమ్మవారిని దర్శించుకోనున్నట్లు దేవాదాయ శాఖ కమిషనర్ రామచంద్ర మోహన్ తెలిపారు. అదే రోజు సాయంత్రం రాష్ట్రపతి ప్రత్యేక పూజలు నిర్వహించనున్నారని వెల్లడించారు. పర్యటన ప్రశాంతంగా, సజావుగా జరిగేలా సంబంధిత శాఖల అధికారులు సమన్వయంతో పటిష్టమైన ఏర్పాట్లు చేపడుతున్నట్లు పేర్కొన్నారు. సమావేశంలో సమాచార శాఖ రీజినల్ జాయింట్ డైరెక్టర్ టి. తిమ్మప్ప, చీఫ్ ఫెస్టివల్ ఆఫీసర్ త్రినాధ్ రావు తదితరులు పాల్గొన్నారు.