జీఎస్టీ సంస్కరణల్లో రాష్ట్రాల ఆదాయానికి రక్షణ కల్పించాలి - భట్టి

జీఎస్టీ సంస్కరణల్లో రాష్ట్రాల ఆదాయ ప్రయోజనాలను పరిరక్షించాలని తెలంగాణ ఉప ముఖ్యమంత్రి భట్టి విక్రమార్క కేంద్ర ప్రభుత్వాన్ని కోరారు. నిజాయతీగా పన్నులు చెల్లించే వారికి ఇబ్బందులు కలగకుండా చూడాలని, ఉద్దేశపూర్వకంగా పన్ను ఎగవేసే వారిపై కఠిన చర్యలు తీసుకోవాలని సూచించారు. గురువారం ఢిల్లీలో కేంద్ర ఆర్థిక మంత్రి నిర్మలా సీతారామన్‌ అధ్యక్షతన జరిగిన 57వ జీఎస్టీ కౌన్సిల్‌ సమావేశంలో ఆయన ఈ అంశాలను ప్రస్తావించారు. జీఎస్టీ అమలుతో ఉమ్మడి జాతీయ మార్కెట్‌ ఏర్పాటుకు రాష్ట్రాలు తమ స్వతంత్ర పన్నుల విధింపు అధికారాలను తగ్గించుకున్న విషయాన్ని గుర్తుచేశారు.

హైదరాబాద్‌లో జీఎస్టీఎన్‌, జీఎస్టీ కౌన్సిల్‌ సెక్రటేరియట్‌ ప్రాంతీయ కార్యాలయాలను ఏర్పాటు చేయాలని భట్టి విక్రమార్క కోరారు. దీనివల్ల జీఎస్టీ పరిపాలన, పన్ను మోసాల గుర్తింపు వ్యవస్థ మరింత బలోపేతమవుతాయని తెలిపారు. మోటారు వాహనాల పన్ను మార్పుల వల్ల తెలంగాణకు ఏటా సుమారు రూ.800 కోట్ల ఆదాయం తగ్గే అవకాశం ఉందని పేర్కొంటూ, మార్పుల ఆర్థిక ప్రభావాన్ని ముందుగానే రాష్ట్రాలకు తెలియజేయాలని సూచించారు. నకిలీ జీఎస్టీ రిజిస్ట్రేషన్లు, ఆధార్‌, పాన్‌ వివరాల దుర్వినియోగం, స్క్రాప్‌ రంగంలో పన్ను ఎగవేతను అరికట్టాలని కోరారు. జీఎస్టీ కౌన్సిల్‌ అధికారుల కమిటీలు, స్టాండింగ్‌ కమిటీలో తెలంగాణకు తగిన ప్రాతినిధ్యం కల్పించాలని విజ్ఞప్తి చేశారు.