విజయవాడలో మిషన్‌ కర్మయోగిపై ప్రాంతీయ సదస్సు

ప్రభుత్వ ఉద్యోగుల్లో సామర్థ్య నిర్మాణం, పరిపాలనా నైపుణ్యాల పెంపు లక్ష్యంగా మిషన్‌ కర్మయోగి కింద ‘సాధనా శృంఖల’ ప్రాంతీయ వర్క్‌షాప్‌ విజయవాడలో సెప్టెంబర్‌ 29, 30 తేదీల్లో జరగనుంది. డాక్టర్‌ బీఆర్‌ అంబేడ్కర్‌ కళావేదికలో నిర్వహించే ఈ సదస్సుకు ఆంధ్రప్రదేశ్‌తో పాటు తెలంగాణ, కర్ణాటక, కేరళ, తమిళనాడు, ఒడిశా, పుదుచ్చేరి రాష్ట్రాల అధికారులు, శిక్షణ సంస్థల ప్రతినిధులు, నిపుణులు పాల్గొంటారు. ముఖ్యమంత్రి చంద్రబాబు నాయుడు, కేంద్ర మంత్రి జితేంద్ర సింగ్‌ కార్యక్రమంలో పాల్గొననున్నారు.

ప్రభుత్వ శిక్షణ సంస్థలను కేవలం కోర్సులు నిర్వహించే కేంద్రాలుగా కాకుండా శాఖల పనితీరును మెరుగుపరిచే సామర్థ్య నిర్మాణ సంస్థలుగా తీర్చిదిద్దడంపై సదస్సులో చర్చించనున్నారు. ఐగాట్‌-మిషన్‌ కర్మయోగి వేదికను వినియోగించే విధానం, మిషన్‌ కర్మయోగి క్వాలిటీ ఫ్రేమ్‌వర్క్‌, కర్మయోగి కర్తవ్య కార్యక్రమం, శిక్షణ సంస్థల పాలన, డిజిటల్‌ సాంకేతికత తదితర అంశాలపై చర్చలు జరుగుతాయి. వివిధ రాష్ట్రాలు తమ అనుభవాలు, ఉత్తమ విధానాలను పంచుకోనున్నాయి.