రేవంత్‌రెడ్డికి ‘ఆర్యదాన్‌ ముహమ్మద్‌-2026’ అవార్డు

తెలంగాణ ముఖ్యమంత్రి ఎ. రేవంత్‌రెడ్డి ప్రతిష్ఠాత్మక ‘ఆర్యదాన్‌ ముహమ్మద్‌-2026 బెస్ట్‌ పబ్లిక్‌ సర్వెంట్‌’ అవార్డుకు ఎంపికయ్యారు. కేరళకు చెందిన దివంగత కాంగ్రెస్‌ నేత, మాజీ మంత్రి ఆర్యదాన్‌ ముహమ్మద్‌ స్మారకార్థం ఆర్యదాన్‌ ముహమ్మద్‌ ఫౌండేషన్‌ ఈ పురస్కారాన్ని అందిస్తోంది. తెలంగాణలో రైతులు, వెనుకబడిన వర్గాలు, సామాన్య ప్రజల సంక్షేమం కోసం చేపట్టిన కార్యక్రమాలు, నాయకత్వం, ప్రజాస్వామిక విలువల పట్ల నిబద్ధతను పరిగణనలోకి తీసుకుని రేవంత్‌రెడ్డిని ఎంపిక చేసినట్లు ఫౌండేషన్‌ వర్కింగ్‌ ఛైర్మన్‌, నిలంబూర్‌ ఎమ్మెల్యే ఆర్యదాన్‌ షౌకత్‌ తెలిపారు. ఎంపీ బెన్నీ బెహనన్‌, కేరళ రెవెన్యూ మంత్రి ఏపీ అనిల్‌కుమార్‌, రచయిత, మేధావి కల్పెట్ట నారాయణన్‌ జ్యూరీ సభ్యులుగా వ్యవహరించారు.

ఆర్యదాన్‌ ముహమ్మద్‌ నాలుగో వర్ధంతిని పురస్కరించుకుని శుక్రవారం కేరళలోని నిలంబూర్‌లో సాయంత్రం 4 గంటలకు జరిగే కార్యక్రమంలో రేవంత్‌రెడ్డికి ఈ అవార్డును ప్రదానం చేయనున్నారు. పురస్కారం కింద రూ.లక్ష నగదు బహుమతి, ప్రశంసాపత్రం, జ్ఞాపిక అందజేస్తారు. కార్యక్రమంలో ఏఐసీసీ ప్రధాన కార్యదర్శి (సంస్థాగత) కె.సి. వేణుగోపాల్‌ ఆర్యదాన్‌ ముహమ్మద్‌ స్మారకోపన్యాసం చేయనున్నారు. ఆర్యదాన్‌ ముహమ్మద్‌ కేరళ అసెంబ్లీకి ఎనిమిదిసార్లు ఎన్నికై, నాలుగు వేర్వేరు ప్రభుత్వాల్లో మంత్రిగా పనిచేశారు. ప్రజా సంక్షేమం, ప్రజాస్వామిక విలువలు, కార్మికుల అంశాలపై ఆయన చేసిన సేవలను ఫౌండేషన్‌ గుర్తుచేసింది.