అస్సాం వరద బాధితులకు అండగా సల్మాన్ ఖాన్..

అస్సాంలో ఇటీవల సంభవించిన భారీ వరదల కారణంగా ఇళ్లు కోల్పోయిన కుటుంబాలకు బాలీవుడ్ స్టార్ సల్మాన్ ఖాన్ అండగా నిలిచారు. వరద బాధితులకు సురక్షితమైన, శాశ్వత నివాసం కల్పించేందుకు చేపట్టిన 'ఆషియానా – సురక్షిత ఆశ్రయంతో ఆశ మొదలవుతుంది' కార్యక్రమానికి ఆయన మద్దతు ప్రకటించారు. ఈ కార్యక్రమం కింద మొత్తం 500 ఇళ్ల నిర్మాణం లక్ష్యంగా పెట్టుకోగా, ప్రకృతి విపత్తుతో నిరాశ్రయులైన కుటుంబాలకు కొత్త జీవితాన్ని అందించాలనే ఉద్దేశంతో ఈ ప్రాజెక్టును అమలు చేస్తున్నారు.

అస్సాంలోని నేపాలీ ఖుటి ప్రాంతంలో ఇప్పటికే నిర్మాణ పనులు ప్రారంభమయ్యాయి. తొలి దశలో సుమారు 220 ఇళ్ల నిర్మాణం పూర్తికాగా, త్వరలో మిగిలిన ఇళ్ల నిర్మాణాన్ని కూడా పూర్తి చేయాలని నిర్వాహకులు లక్ష్యంగా పెట్టుకున్నారు. సల్మాన్ ఖాన్ ఈ కార్యక్రమానికి మద్దతు ఇవ్వడం వల్ల మరింత మంది సహాయక చర్యల్లో భాగస్వాములు అవుతారని నిర్వాహకులు ఆశాభావం వ్యక్తం చేస్తున్నారు. గతంలో కూడా విద్య, వైద్యం, విపత్తు సహాయ కార్యక్రమాల్లో పాల్గొన్న సల్మాన్ మరోసారి తన సామాజిక బాధ్యతను చాటుకున్నారు.