పెళ్లిపై సారా టెండూల్కర్‌ క్లారిటీ

క్రికెట్ దిగ్గజం సచిన్ టెండూల్కర్ కుమార్తెగా మాత్రమే కాకుండా, న్యూట్రిషనిస్ట్‌, డిజిటల్ కంటెంట్ క్రియేటర్‌, వెల్‌నెస్‌ ఎంటర్‌ప్రెన్యూర్‌గా సారా టెండూల్కర్‌ తనకంటూ ప్రత్యేక గుర్తింపు తెచ్చుకుంటున్నారు. తాజాగా తన వ్యక్తిగత జీవితం, పెళ్లి, సంబంధాలపై ఆసక్తికర వ్యాఖ్యలు చేసి మరోసారి వార్తల్లో నిలిచారు. తన తల్లిదండ్రులు సచిన్‌, అంజలి టెండూల్కర్‌ మధ్య ఉన్న అనుబంధం తనకు ఎంతో ఇష్టమని, భార్యాభర్తల కంటే ముందుగా వారిద్దరూ మంచి స్నేహితుల్లా ఉంటారని సారా తెలిపారు.

తన భవిష్యత్‌ జీవిత భాగస్వామిలో స్నేహం, సరదా, పరస్పర అవగాహన ఉండాలని కోరుకుంటున్నట్లు చెప్పారు. చిన్నప్పటి నుంచి సచిన్‌, అంజలి మధ్య సరదా సంభాషణలు, స్నేహపూర్వకమైన మాటలు చూస్తూ పెరిగానని, అదే తన ఆలోచనలను ప్రభావితం చేసిందని పేర్కొన్నారు. కేవలం కుటుంబం లేదా సమాజం ఒత్తిడి కారణంగా పెళ్లి చేసుకోవడం తనకు ఇష్టం లేదని, తొందరపడే ఆలోచన కూడా లేదని స్పష్టం చేశారు. సంబంధం సరిగ్గా లేదని అనిపిస్తే పెళ్లి వరకు వెళ్లకుండా ముందుగానే తప్పుకోవడం మంచిదని, నేటి తరం తమ జీవితాలపై మరింత ధైర్యంగా నిర్ణయాలు తీసుకుంటోందని అభిప్రాయపడ్డారు.