హాలోవీన్‌ వేళ డాలస్‌లో కాల్పుల కలకలం..

అమెరికాలోని టెక్సాస్‌ రాష్ట్రం డాలస్‌లో వరుస కాల్పులు కలకలం సృష్టించాయి. నగరంలోని మూడు వేర్వేరు ప్రాంతాల్లో జరిగిన కాల్పుల్లో నలుగురు మృతి చెందగా, మరో 15 మంది గాయపడినట్లు పోలీసులు వెల్లడించారు. డాలస్‌ పోలీస్‌ చీఫ్‌ డేనియల్‌ కమాక్స్‌ ఈ ఘటనల వివరాలను వెల్లడించారు. కాల్పులు ఎందుకు జరిగాయనే విషయంపై ఇంకా స్పష్టత రాలేదని, డీప్‌ ఎలమ్‌ ప్రాంతంలో చోటుచేసుకున్న కాల్పుల ఘటనకు వీటితో సంబంధం ఉందా అనే కోణంలోనూ దర్యాప్తు చేస్తున్నామని తెలిపారు. ఈ ఘటనలకు సంబంధించి పలువురు అనుమానితులను అదుపులోకి తీసుకున్నట్లు పేర్కొన్నారు.

హాలోవీన్‌ వారాంతం సందర్భంగా అమెరికాలోని పలు ప్రాంతాల్లో హింసాత్మక ఘటనలు చోటుచేసుకున్నట్లు సమాచారం. ప్రతి ఏడాది అక్టోబర్‌ 31న నిర్వహించే హాలోవీన్‌ వేడుకల్లో భాగంగా ప్రజలు దెయ్యాలు, రాక్షసుల వేషధారణలు చేస్తారు. గుమ్మడికాయలతో ఇళ్లను అలంకరించి, స్నేహితులు, కుటుంబ సభ్యులతో విందులు, వినోదాల్లో పాల్గొంటారు. ఈ వేడుకల కోసం దుస్తులు, అలంకరణ వస్తువులు, క్యాండీల కొనుగోలుపై అమెరికన్లు పెద్ద మొత్తంలో ఖర్చు చేస్తారు. మరోవైపు డాలస్‌ కాల్పుల ఘటనలపై పోలీసులు దర్యాప్తు కొనసాగిస్తున్నారు.