రేవంత్‌రెడ్డి రాష్ట్రాన్ని దివాలా తీయించారు-కేటీఆర్‌

ముఖ్యమంత్రి రేవంత్‌రెడ్డి పాలనలో తెలంగాణ రాష్ట్రం ఆర్థికంగా దివాలా తీసే పరిస్థితికి చేరుకుందని బీఆర్‌ఎస్‌ కార్యనిర్వాహక అధ్యక్షుడు కేటీఆర్‌ విమర్శించారు. ఆదిలాబాద్‌లో నిర్వహించిన బీఆర్‌ఎస్‌ రైతుగర్జన సభలో ఆయన మాట్లాడుతూ.. రాష్ట్రంలో రైతుబంధు సాయం నిలిచిపోయిందని ఆరోపించారు. దిల్లీలో రాహుల్‌ గాంధీ ఖాతాలో మాత్రం ప్రతి నెలా ఈఎంఐ పడుతోందని వ్యాఖ్యానించారు. కాంగ్రెస్‌, బీజేపీ బయటకు పరస్పరం పోరాడుతున్నట్లు కనిపించినా, దిల్లీలో కలిసిపోతున్నాయని, రెండు పార్టీలు కలిసి ప్రజలను దోచుకుంటున్నాయని విమర్శించారు.

ప్రధాని మోదీ పేదల ఖాతాల్లో రూ.15 లక్షలు వేస్తామన్న హామీని నెరవేర్చారా అని కేటీఆర్‌ ప్రశ్నించారు. ఆదిలాబాద్‌లోని సీసీఐ ఫ్యాక్టరీని తుక్కు కింద అమ్ముతున్నారని ఆరోపించారు. తెలంగాణకు కేంద్రం ఒక్క జాతీయ ప్రాజెక్టు కూడా ఇవ్వలేదని, మెడికల్‌ కాలేజీలు, జాతీయ విద్యాసంస్థల విషయంలోనూ అన్యాయం చేసిందని విమర్శించారు. యూరియా కోసం రైతులు చెప్పులు క్యూలో పెట్టే పరిస్థితి మళ్లీ వచ్చిందని ఆవేదన వ్యక్తం చేశారు. ఇండస్ట్రియల్‌ కారిడార్‌ పేరుతో స్థానిక ఎమ్మెల్యే పాయల్‌ శంకర్‌ కుటుంబం దోపిడీకి పాల్పడుతోందని కూడా ఆరోపించారు. ఇవన్నీ రైతుగర్జన సభలో కేటీఆర్‌ చేసిన రాజకీయ విమర్శలు.