ఫోన్‌ ట్యాపింగ్‌ కేసులో కీలక మలుపు..

తెలంగాణలో సంచలనం సృష్టించిన ఫోన్‌ అక్రమ ట్యాపింగ్‌ కేసులో దర్యాప్తు కీలక దశకు చేరినట్లు సమాచారం. అనుబంధ అభియోగపత్రం దాఖలుకు సిట్‌ సిద్ధమవుతున్న నేపథ్యంలో ఓ విశ్రాంత డీజీపీతో పాటు ప్రస్తుతం కీలక విభాగానికి అధిపతిగా ఉన్న మరో డీజీ స్థాయి అధికారిని సాక్షులుగా చేర్చే దిశగా అడుగులు వేస్తున్నట్లు తెలుస్తోంది. విచారణ సమయంలో వీరిద్దరి వాంగ్మూలాలు కేసును కీలక మలుపు తిప్పే అవకాశం ఉందని సిట్‌ భావిస్తున్నట్లు సమాచారం. ఆగస్టు చివరి నాటికి అనుబంధ ఛార్జ్‌షీట్‌ దాఖలు చేసే అవకాశం ఉందని తాజా నివేదికలు పేర్కొంటున్నాయి.

గత ప్రభుత్వ హయాంలో కీలక బాధ్యతలు నిర్వహించిన ఈ ఇద్దరు ఉన్నతాధికారులు.. మాజీ ఎస్‌ఐబీ చీఫ్‌ టి.ప్రభాకర్‌రావును లీగల్‌ ఇంటర్‌సెప్షన్‌కు డిజిగ్నేటెడ్‌ అథారిటీగా నియమించిన వ్యవహారంలో నిబంధనల ఉల్లంఘనలను అడ్డుకోవడంలో విఫలమయ్యారా అనే కోణంలోనూ దర్యాప్తు సాగుతున్నట్లు సమాచారం. ఇదే సమయంలో ముగ్గురు బీఆర్‌ఎస్‌ ప్రముఖుల పాత్రపైనా సిట్‌ దృష్టి సారించినట్లు తెలుస్తోంది. ఆదేశాల పరంపరను, అక్రమ ట్యాపింగ్‌కు బాధ్యులెవరో నిర్ధారించడంలో ఈ ఇద్దరు అధికారుల వాంగ్మూలాలు కీలకమవుతాయని దర్యాప్తు సంస్థ భావిస్తున్నట్లు సమాచారం. ఈ కేసులో కీలక నిందితుడిగా ఉన్న మాజీ ఎస్‌ఐబీ చీఫ్‌ ప్రభాకర్‌రావుకు దర్యాప్తు కొనసాగుతున్న సమయంలో సుప్రీంకోర్టు ముందస్తు బెయిల్‌ మంజూరు చేసింది.