పోలవరం ఏజెన్సీలో పెద్దపులి సంచారం.. భక్తులకు అటవీశాఖ హెచ్చరిక

పోలవరం జిల్లాలోని దేవీపట్నం మండలం ఇందుకూరు రేంజ్‌లో పెద్దపులి సంచారం కలకలం రేపుతోంది. ఏజెన్సీ ప్రాంతాల్లో దాదాపు 10 నెలలుగా పులి కదలికలు కొనసాగుతున్నట్లు సమాచారం. నెలకోట–రామదుర్గం మార్గంలోని పోలవరం ప్రాజెక్టు టన్నెల్‌ సమీపంలో పులి సంచారాన్ని అటవీశాఖ అధికారులు గుర్తించారు. దీంతో రామదుర్గం కొండపైకి భక్తులు వెళ్లవద్దని అధికారులు హెచ్చరించారు. పూడిపల్లి, గొందూరు, పోచమ్మగండి, రామదుర్గం, నెలకోట, చిన్నారిగండి గ్రామాల ప్రజలు అప్రమత్తంగా ఉండాలని సూచించారు. ఇటీవల కూడా పోలవరం ఏజెన్సీ పరిధిలో పులి పశువులపై దాడులు చేసిన ఘటనలు నమోదయ్యాయి.

గతంలో ఇందుకూరు రేంజ్‌లో అడవి పంది పిల్లను పులి చంపినట్లు అధికారులు గుర్తించారు. అలాగే ఫోక్స్‌పేట రేంజ్‌లో ఆరు పశువులపై దాడుల అనంతరం పులి ఇందుకూరు రేంజ్‌ వైపు వచ్చినట్లు సమాచారం. పులి సంచారంతో గిరిజన గ్రామాల ప్రజలు ఆందోళనకు గురవుతున్నారు. రాత్రివేళల్లో ఒంటరిగా బయటకు రావద్దని, అడవులు, తోటల వైపు వెళ్లేటప్పుడు అప్రమత్తంగా ఉండాలని అధికారులు సూచిస్తున్నారు. పులి కదలికలను పర్యవేక్షిస్తూ, దాన్ని సురక్షితంగా పట్టుకుని అటవీ ప్రాంతంలోకి తరలించేందుకు అటవీశాఖ చర్యలు చేపడుతోంది. పులి కదలికలను గుర్తించేందుకు అటవీ అధికారులు ట్రాప్‌ కెమెరాలు, డ్రోన్లను కూడా వినియోగిస్తున్నట్లు తాజా నివేదికలు చెబుతున్నాయి.