తిరుమలలో నవంబర్ ఉత్సవాల క్యాలెండర్ విడుదల..

తిరుమల శ్రీ వేంకటేశ్వరస్వామివారి ఆలయంలో నవంబర్ నెలలో నిర్వహించనున్న ముఖ్యమైన పర్వదినాలు, ఉత్సవాల షెడ్యూల్‌ను తిరుమల తిరుపతి దేవస్థానాలు (టీటీడీ) వెల్లడించింది. పవిత్ర కార్తీక మాసంలో ప్రత్యేక పూజలు, ఆస్థానాలు, వాహన సేవలతో తిరుమల ఆధ్యాత్మిక శోభను సంతరించుకోనుంది. నవంబర్ 2న తిరుమల నంబి ఉత్సవాలతో వేడుకలు ప్రారంభం కానున్నాయి. నవంబర్ 8న ఉదయం 7 నుంచి 9 గంటల వరకు బంగారు వాకిలి ముందు ఉన్న ఘంటా మండపంలో దీపావళి ఆస్థానం నిర్వహించనున్నారు. ఈ సందర్భంగా శ్రీదేవి, భూదేవి సమేత శ్రీ మలయప్పస్వామివారు సర్వభూపాల వాహనంపై గరుడాళ్వార్‌కు అభిముఖంగా వేంచేపు చేస్తారు. అనంతరం ప్రత్యేక పూజలు, హారతి, ప్రసాద నివేదన నిర్వహిస్తారు. సాయంత్రం స్వామివారు సహస్ర దీపాలంకరణ సేవలో పాల్గొని నాలుగు మాడ వీధుల్లో విహరించనున్నారు.

నవంబర్ 13న నాగుల చవితి సందర్భంగా స్వామివారు పెద్దశేష వాహనంపై భక్తులకు దర్శనమివ్వనున్నారు. అదే రోజు తిరుమల నంబి ఉత్సవాలు, శ్రీ మనవాళ మహామునుల శాత్తుమొర కార్యక్రమాలు ముగియనున్నాయి. నవంబర్ 15, 16 తేదీల్లో శ్రీవారి పుష్పయాగం నిర్వహిస్తారు. నవంబర్ 19న యాజ్ఞవల్క్య జయంతి, 21న కైశిక ద్వాదశి ఆస్థానం, చక్రతీర్థ ముక్కోటి ఉత్సవాలు జరగనున్నాయి. నవంబర్ 24న కార్తీక దీపోత్సవం, 25న తిరుప్పాణాళ్వార్ వర్ష తిరు నక్షత్రంతో నెలవారీ ప్రత్యేక ఉత్సవాలు ముగియనున్నాయి. దీపావళి ఆస్థానం సందర్భంగా కల్యాణోత్సవం, ఊంజల్ సేవ, ఆర్జిత బ్రహ్మోత్సవం వంటి కొన్ని ఆర్జిత సేవలు రద్దయ్యే అవకాశం ఉందని సమాచారం. భక్తులు తిరుమల యాత్రను ప్లాన్ చేసుకునే ముందు టీటీడీ అధికారిక ప్రకటనల్లో తాజా షెడ్యూల్, సేవల లభ్యతను నిర్ధారించుకోవాలి.