తిరుమలలో కొనసాగుతున్న భక్తుల రద్దీ

తిరుమలలో శ్రీవారి దర్శనానికి భక్తుల రద్దీ కొనసాగుతోంది. బుధవారం సాయంత్రం 5 గంటల వరకు ఉన్న సమాచారం ప్రకారం, సర్వదర్శనం కోసం వచ్చిన భక్తులతో వైకుంఠం క్యూ కాంప్లెక్స్‌-2లోని 31 కంపార్ట్‌మెంట్లు, నారాయణగిరిలోని తొమ్మిది షెడ్లు పూర్తిగా నిండిపోయాయి. దీంతో భక్తుల క్యూలైన్‌ ఆక్టోపస్‌ భవనం సర్కిల్‌ వరకు విస్తరించింది. మరోవైపు, వైకుంఠం క్యూ కాంప్లెక్స్‌-1లోని ఆరు కంపార్ట్‌మెంట్లలో సమయ నిర్దేశిత టోకెన్ల భక్తులు వేచి ఉన్నారు. శ్రీవారి దర్శనానికి దాదాపు 20 గంటల సమయం పడుతోంది.

సోమవారం శ్రీవారి హుండీ ఆదాయం రూ.4.13 కోట్లుగా నమోదైంది. మంగళవారం మొత్తం 77,082 మంది భక్తులు శ్రీవారిని దర్శించుకున్నారు. అదే రోజు 34,039 మంది భక్తులు తలనీలాలు సమర్పించారు.