రష్యాపై విరుచుకుపడ్డ ఉక్రెయిన్..

ఉక్రెయిన్ రష్యాపై భారీ స్థాయిలో డ్రోన్ దాడులకు పాల్పడినట్లు సమాచారం. ఈ దాడుల్లో ఆరుగురు మృతి చెందగా, పలువురు తీవ్రంగా గాయపడినట్లు రష్యా అధికారులు వెల్లడించారు. దాడుల నేపథ్యంలో మాస్కోలోని పలు విమానాశ్రయాలను తాత్కాలికంగా మూసివేశారు. భద్రతా కారణాలతో విమాన రాకపోకలను నిలిపివేసినట్లు అధికారులు తెలిపారు.

రష్యా రక్షణ శాఖ వెల్లడించిన వివరాల ప్రకారం, దేశంలోని పలు ప్రాంతాలపైకి వచ్చిన మొత్తం 822 ఉక్రెయిన్ డ్రోన్లను కూల్చివేసినట్లు పేర్కొంది. భారీ సంఖ్యలో డ్రోన్లు ప్రయోగించడంతో రష్యా వైమానిక రక్షణ వ్యవస్థలను అప్రమత్తం చేసింది. ఈ దాడులు రష్యా–ఉక్రెయిన్ మధ్య కొనసాగుతున్న యుద్ధంలో మరో కీలక పరిణామంగా మారాయి.