అపోలో ప్రాజెక్టులకు ఉపాసన కీలక బాధ్యతలు

నటుడు రామ్‌చరణ్‌ సతీమణి, అపోలో హాస్పిటల్స్‌ గ్రూప్‌ సీఎస్‌ఆర్‌ విభాగం వైస్‌ చైర్‌పర్సన్‌ ఉపాసన కొణిదెలకు సంస్థలో కీలక బాధ్యతలు దక్కాయి. అపోలో హాస్పిటల్స్‌ డైరెక్టర్‌–ప్రాజెక్ట్స్‌గా ఆమె బాధ్యతలు చేపట్టనున్నారు. దేశవ్యాప్తంగా కొత్త ఆసుపత్రుల నిర్మాణం, ఇప్పటికే ఉన్న ఆసుపత్రుల విస్తరణ, అభివృద్ధి ప్రాజెక్టుల ప్రణాళిక, అమలును అపోలో యాజమాన్యం, వైద్య బృందాలు, ప్రాజెక్ట్‌ భాగస్వాములతో కలిసి ఆమె పర్యవేక్షించనున్నారు.

అపోలో హాస్పిటల్స్‌ దేశవ్యాప్తంగా చేపట్టనున్న విస్తరణ ప్రణాళికకు సుమారు రూ.8,600 కోట్ల ప్రాజెక్ట్‌ వ్యయం అంచనా వేస్తున్న సమయంలో ఉపాసనకు ఈ బాధ్యతలు దక్కాయి. ప్రపంచస్థాయి వైద్య సేవలు ప్రజలకు అందుబాటులో ఉండాలన్న తన తాత, అపోలో హాస్పిటల్స్‌ వ్యవస్థాపకుడు డాక్టర్‌ ప్రతాప్‌ సి. రెడ్డి లక్ష్యాన్ని ముందుకు తీసుకెళ్లడమే తన బాధ్యత అని ఉపాసన పేర్కొన్నారు.