ఇరాన్‌ ప్రయాణాలపై అమెరికా కీలక సూచనలు

ఇరాన్‌లో భద్రతా పరిస్థితులు మరింత సంక్లిష్టంగా మారుతున్న నేపథ్యంలో అమెరికా కీలక భద్రతా హెచ్చరిక జారీ చేసింది. ఏ కారణంతోనూ ఇరాన్‌కు ప్రయాణించవద్దని, ఇప్పటికే అక్కడ ఉన్న అమెరికా పౌరులు వీలైనంత త్వరగా దేశం విడిచి వెళ్లాలని అమెరికా వర్చువల్‌ ఎంబసీ సూచించింది. విమానాశ్రయాలు, విమానయాన సంస్థలు, సరిహద్దు మార్గాల్లో మార్పులను ఎప్పటికప్పుడు గమనించాలని, ఇతర దేశాలకు వెళ్లేవారు ఆయా దేశాల ప్రవేశ నిబంధనలను ముందుగానే తెలుసుకోవాలని తెలిపింది. నిరసనలు, భారీ జనసమూహాలకు దూరంగా ఉండాలని, అమెరికాతో బహిరంగ అనుబంధం ఉన్న ప్రాంతాల్లో అప్రమత్తంగా ఉండాలని సూచించింది.

విమాన సర్వీసులు, గగనతల మార్గాల్లో ఆకస్మిక మార్పులు లేదా రద్దులు జరిగే అవకాశం ఉందని అమెరికా హెచ్చరించింది. ఇదే సమయంలో సౌదీ అరేబియాపై హౌతీల దాడులు, అమెరికా ప్రయోజనాలకు పొంచి ఉన్న ముప్పుపై కూడా అమెరికా ఆందోళన వ్యక్తం చేసింది. ఫిబ్రవరి 28న ప్రారంభమైన అమెరికా–ఇరాన్‌ ఘర్షణల ప్రభావంతో ఇరాన్‌ అంతర్జాతీయ విమాన రాకపోకలు తీవ్రంగా దెబ్బతిన్నాయి. మరోవైపు, సైనిక ఉద్రిక్తతల మధ్య దౌత్య ప్రయత్నాలు కూడా కొనసాగుతున్నాయి. అధ్యక్షుడు డొనాల్డ్‌ ట్రంప్‌ ఇరాన్‌ అధ్యక్షుడు మసూద్‌ పెజెష్కియాన్‌తో సమావేశానికి సిద్ధంగా ఉన్నట్లు సంకేతాలు ఇవ్వగా, చైనా ఇరాన్‌, అమెరికా సంయమనం పాటించి జూన్‌లో కుదిరిన కాల్పుల విరమణ ఒప్పందానికి తిరిగి రావాలని కోరుతోంది.