జైపూర్‌లో కిలో స్వీట్ ధర అక్షరాలా రూ.1.11 లక్షలు

రాజస్థాన్‌ రాజధాని జైపూర్‌లో ఓ ప్రత్యేకమైన మిఠాయి ఇప్పుడు అందరి దృష్టిని ఆకర్షిస్తోంది. అక్కడి త్యోహార్ స్వీట్స్‌ దుకాణంలో ‘స్వర్ణ ప్రసాదం’ పేరుతో విక్రయిస్తున్న ఈ స్వీట్‌ ధర హాట్‌టాపిక్‌గా మారింది. దీపావళి పండుగను పురస్కరించుకుని ప్రత్యేకంగా తయారు చేసిన ఈ మిఠాయి కిలో ధర ఏకంగా రూ.1,11,000గా నిర్ణయించారు.

ఈ ఖరీదైన స్వీట్‌ తయారీలో 24 క్యారెట్ల బంగారు రేకు, పైన్ నట్స్‌ (చిల్‌గోజా), ప్రీమియం కుంకుమపువ్వును ఉపయోగిస్తున్నారు. వీటితో పాటు అదే దుకాణంలో ‘సిల్వర్ యాష్’ పేరుతో మరో ప్రత్యేకమైన స్వీట్‌ను కూడా విక్రయిస్తున్నారు. దాని ధర కిలోకు రూ.75,000గా ఉంది. బంగారం, వెండి వంటి విలువైన పదార్థాలతో తయారైన ఈ మిఠాయిలు పండుగ వేళ ప్రత్యేక ఆకర్షణగా నిలుస్తున్నాయి.