రష్యా యాంటీ-ప్లేగు ల్యాబ్‌లో యువతి మృతి.. ప్లేగు అనుమానాలతో కలకలం

రష్యాలోని సైబీరియా ప్రాంతంలోని ఇర్కుట్స్క్ యాంటీ-ప్లేగు రీసెర్చ్ ఇన్‌స్టిట్యూట్‌లో పనిచేసే 28 ఏళ్ల దర్యా షిపిలోవా అనుమానాస్పద పరిస్థితుల్లో మృతి చెందడం చర్చనీయాంశంగా మారింది. సెప్టెంబర్ 29న ఆసుపత్రిలో చేరిన ఆమె అక్టోబర్ 2న మరణించినట్లు రష్యా, స్థానిక మీడియా కథనాలు తెలిపాయి. ఆమెకు తెలియని కారణంతో వచ్చిన న్యూమోనియా ఉన్నట్లు రష్యా ఆరోగ్య పర్యవేక్షణ సంస్థ రోస్పోట్రెబ్నాడ్జోర్ పేర్కొంది. మృతదేహంలో ల్యాబ్‌కు సంబంధించిన ప్రమాదకర సూక్ష్మజీవులు గుర్తించలేదని అధికారులు స్పష్టం చేశారు. అయితే, ప్లేగు పరిశోధన సమయంలో ప్రమాదవశాత్తు వ్యాధికారక పదార్థానికి గురై ఉండొచ్చన్న కథనాలు, ప్లేగు బ్యాక్టీరియా ఉన్న టెస్ట్ ట్యూబ్ పగిలిందన్న వాదనలు ప్రచారంలోకి వచ్చాయి.

యువతి మృతితో ల్యాబ్‌కు చెందిన 60 మందికి పైగా సిబ్బందిని ఐసోలేషన్‌లో ఉంచినట్లు, ఆమెతో సంబంధం ఉన్న పలువురిని వైద్య పర్యవేక్షణలోకి తీసుకున్నట్లు నివేదికలు వెల్లడించాయి. కొన్ని ఆసుపత్రుల్లోనూ అదనపు జాగ్రత్తలు చేపట్టడంతో అనుమానాలు మరింత పెరిగాయి. అయితే రష్యా అధికారులు ఇర్కుట్స్క్‌లో ప్లేగు కేసులు నమోదుకాలేదని, మృతురాలితో సంబంధం ఉన్నవారిలో ప్రమాదకర వ్యాధికారకాలు గుర్తించలేదని ప్రపంచ ఆరోగ్య సంస్థకు తెలిపారు. డబ్ల్యూహెచ్‌ఓ కూడా ప్రస్తుతం రష్యా వెలుపల ప్రజారోగ్య ముప్పు చాలా తక్కువగా ఉందని అంచనా వేసింది. ఈ ఘటనపై అమెరికా అధ్యక్షుడు డొనాల్డ్ ట్రంప్ స్పందిస్తూ రష్యా అధ్యక్షుడు వ్లాదిమిర్ పుతిన్‌తో మాట్లాడనున్నట్లు తెలిపారు. ప్రస్తుతానికి దర్యా షిపిలోవా మృతికి కారణమైన వ్యాధికారకం ఏమిటన్నది తుది పరీక్షలతోనే స్పష్టమయ్యే అవకాశం ఉంది.