మీ ప్రాంతంలో తుపాను సమస్య ఉందా? ఇలా ఫిర్యాదు చేయండి

మురసు తుపాను కారణంగా ప్రజలు ఎదుర్కొంటున్న సమస్యలను ‘మనమిత్ర’ వాట్సప్‌ గవర్నెన్స్‌ సేవ ద్వారా అధికారులకు తెలియజేయవచ్చని ఆర్టీజీఎస్‌ అధికారులు వెల్లడించారు. ప్రజలు తమ ప్రాంతాల్లో తలెత్తిన సమస్యలను నేరుగా అధికారుల దృష్టికి తీసుకెళ్లేందుకు ఈ సదుపాయాన్ని వినియోగించుకోవాలని సూచించారు. ఇందుకోసం 95523 00009 నంబర్‌కు ‘హాయ్‌’ అని వాట్సప్‌ సందేశం పంపాలి. అనంతరం కనిపించే ఆప్షన్లలో ‘మురసు సైక్లోన్‌ ఇష్యూస్‌’ను ఎంచుకోవాలి. ఆ తర్వాత సమస్య తలెత్తిన ప్రాంతం వివరాలు, సమస్య స్వరూపాన్ని నమోదు చేయడంతో పాటు అవసరమైతే ఫొటోలను కూడా అప్‌లోడ్‌ చేయవచ్చు. ఇలా నమోదైన ఫిర్యాదులను సంబంధిత అధికారులకు పంపించి, వాటి పరిష్కారానికి చర్యలు తీసుకుంటామని అధికారులు తెలిపారు.

తుపాను ప్రభావంతో ఇబ్బందులు ఎదుర్కొంటున్న ప్రజలు ఈ వాట్సప్‌ సేవను వినియోగించుకోవాలని ఆర్టీజీఎస్‌ అధికారులు కోరారు. సమస్యను స్పష్టంగా వివరించడంతో పాటు కచ్చితమైన ప్రాంత వివరాలను నమోదు చేయాలని సూచించారు. అత్యవసర పరిస్థితుల్లో సహాయం కోసం 112, 1070, 18004250101 హెల్ప్‌లైన్‌ నంబర్లకు ఫోన్‌ చేసి సమాచారం అందించవచ్చని తెలిపారు. ప్రజల నుంచి అందిన ఫిర్యాదుల ఆధారంగా ప్రభావిత ప్రాంతాలను గుర్తించి, సమస్యల పరిష్కారానికి అధికారులు చర్యలు చేపట్టనున్నారు.