ప్రభాస్ ‘ఫౌజీ’ విడుదలపై కొత్త ప్రచారం.. ‘స్పిరిట్’కు వాయిదా తప్పదా?

పాన్ ఇండియా స్టార్ ప్రభాస్ నటిస్తున్న పీరియడ్ యాక్షన్ డ్రామా ‘ఫౌజీ’ విడుదల తేదీపై కొత్త ప్రచారం మొదలైంది. తొలుత డిసెంబర్‌లో విడుదల చేయాలని భావించిన ఈ చిత్రాన్ని 2027 మార్చి 18న ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నట్లు సమాచారం. డిసెంబర్ నాటికి మిగిలిన చిత్రీకరణతో పాటు రెండు భారీ యాక్షన్ సీక్వెన్స్‌లను పూర్తి చేసేందుకు చిత్రబృందం వేగంగా పని చేస్తున్నట్లు తెలుస్తోంది.

ప్రస్తుతం ఆలయం సెట్‌లో ఇంటర్వెల్ ఫైట్‌ను చిత్రీకరిస్తుండగా, నవంబర్ 15 నుంచి క్లైమాక్స్ సన్నివేశాల షూటింగ్ ప్రారంభం కానున్నట్లు ప్రచారం జరుగుతోంది. డిసెంబర్ మొదటి వారానికల్లా ప్రభాస్ టాకీ పార్ట్ పూర్తయ్యే అవకాశం ఉందని, అనంతరం ఆయన ‘స్పిరిట్’ సినిమా కోసం రెండు నెలల లొకేషన్ షెడ్యూల్‌లో పాల్గొంటారని సమాచారం. అక్టోబర్ 23న ప్రభాస్ పుట్టినరోజు సందర్భంగా ‘ఫౌజీ’ గ్లింప్స్ లేదా టీజర్‌ను విడుదల చేసి ప్రచార కార్యక్రమాలు ప్రారంభించాలని మేకర్స్ భావిస్తున్నట్లు తెలుస్తోంది. ఈ సినిమాలో ప్రభాస్ డూప్ లేకుండా స్టంట్స్ చేసినట్లు కూడా ప్రచారం జరుగుతోంది. అయితే, మార్చి 18 విడుదల తేదీపై అధికారిక ప్రకటన ఇంకా రాలేదు. ఆ తేదీ ఖరారైతే, మార్చి 5న విడుదల కావాల్సిన ‘స్పిరిట్’ షెడ్యూల్‌లోనూ మార్పులు వచ్చే అవకాశం ఉంది.