‘దృశ్యం 4’పై నిర్మాత కీలక అప్‌డేట్

2013లో మోహన్‌లాల్‌, దర్శకుడు జీతూ జోసెఫ్‌ కాంబినేషన్‌లో వచ్చిన ‘దృశ్యం’తో ప్రారంభమైన ఈ ఫ్రాంచైజీ మలయాళ చిత్ర పరిశ్రమలో ప్రత్యేక గుర్తింపు తెచ్చుకుంది. తాజాగా ఈ సిరీస్‌కు నాలుగో భాగం కూడా ఉండే అవకాశం ఉందనే వార్తలు వినిపిస్తున్నాయి. మజవిల్‌ మనోరమ అవార్డ్స్‌ కార్యక్రమంలో నిర్మాత ఆంటోని పెరుంబవూర్‌ ‘దృశ్యం 4’ కచ్చితంగా ఉంటుందని చెప్పినట్లు ఓ వీడియోలో కనిపిస్తోంది. అయితే మోహన్‌లాల్‌, జీతూ జోసెఫ్‌ ఈ విషయంపై ఇప్పటివరకు అధికారికంగా స్పందించలేదు.

మే 21న విడుదలైన ‘దృశ్యం 3’లో మోహన్‌లాల్‌, మీనా మరోసారి జార్జ్‌కుట్టి, రాణి పాత్రల్లో కనిపించారు. ఈ భాగంలో కథను పూర్తిగా ముగించకుండా, తదుపరి భాగానికి అవకాశం ఉండేలా ముగించినట్లు తెలుస్తోంది. తమ కుమారుడి మరణానికి ప్రతీకారం తీర్చుకోవాలని చూస్తున్న సిద్ధిఖ్‌, ఆశా శరత్‌ పాత్రల కథ కూడా ఇంకా కొనసాగాల్సి ఉండటంతో ‘దృశ్యం 4’పై ప్రేక్షకుల్లో ఆసక్తి పెరుగుతోంది.