మెగా హీరోతో కోలీవుడ్‌ స్టార్ డైరెక్టర్..

మెగా హీరో వరుణ్ తేజ్ తన సినీ ప్రయాణంలో మరో ఆసక్తికరమైన ప్రాజెక్ట్‌తో ప్రేక్షకుల ముందుకు వచ్చేందుకు సిద్ధమవుతున్నట్లు తెలుస్తోంది. విభిన్న కథలు, పాత్రలను ఎంచుకుంటూ తనకంటూ ప్రత్యేక గుర్తింపు తెచ్చుకున్న వరుణ్ తేజ్.. ప్రముఖ తమిళ దర్శకుడు కార్తిక్ సుబ్బరాజుతో కలిసి పనిచేయనున్నట్లు సినీ వర్గాల్లో ప్రచారం జరుగుతోంది. ఈ కాంబినేషన్‌పై ఇప్పటికే ప్రేక్షకుల్లో ఆసక్తి నెలకొంది.

విలక్షణమైన కథన శైలికి పేరుగాంచిన కార్తిక్ సుబ్బరాజు ఇప్పటివరకు యాక్షన్, రివెంజ్‌ డ్రామాలతో పాటు విభిన్నమైన చిత్రాలను తెరకెక్కించారు. అయితే ఈసారి ఆయన పూర్తిగా భిన్నమైన జానర్‌ను ఎంచుకున్నట్లు సమాచారం. వరుణ్ తేజ్ హీరోగా పూర్తి స్థాయి రొమాంటిక్‌ లవ్‌స్టోరీని రూపొందించేందుకు సన్నాహాలు చేస్తున్నట్లు టాక్ వినిపిస్తోంది. ఈ కాంబినేషన్‌ అధికారికంగా ఖరారైతే, కార్తిక్‌ సుబ్బరాజు ప్రత్యేకమైన టేకింగ్‌, వరుణ్‌ తేజ్‌ స్క్రీన్‌ ప్రెజెన్స్‌ కలసి ప్రేక్షకులకు సరికొత్త అనుభూతిని అందించే అవకాశం ఉంది. ఈ ప్రాజెక్ట్‌పై త్వరలోనే అధికారిక ప్రకటన వెలువడే అవకాశం ఉందని సినీ వర్గాలు చెబుతున్నాయి.