సదరన్‌ జోనల్‌ కౌన్సిల్‌లో తెలంగాణ గళం..

తమిళనాడులోని మహాబలిపురంలో జరిగిన సదరన్‌ జోనల్‌ కౌన్సిల్‌ సమావేశంలో తెలంగాణ పలు కీలక నీటి పారుదల డిమాండ్లను కేంద్రం దృష్టికి తీసుకెళ్లింది. కర్ణాటక చేపడుతున్న అప్పర్‌ భద్ర ప్రాజెక్టుకు ఇచ్చిన అనుమతులను రద్దు చేయాలని కోరింది. అలాగే కాళేశ్వరం, పాలమూరు-రంగారెడ్డి ప్రాజెక్టుల్లో ఏదో ఒకదానికి జాతీయ హోదా కల్పించి, కేంద్రం ఆర్థిక సాయం అందించాలని డిమాండ్‌ చేసింది.

కృష్ణా జలాల విషయంలోనూ తెలంగాణ తన వాదనను వినిపించింది. కృష్ణా పరివాహక ప్రాంతంలో దిగువన ఉన్న రాష్ట్రాలు రెండేనని, ఈ అంశంలో కర్ణాటకకు సంబంధం లేదని పేర్కొంది. 2016 అక్టోబర్‌లోనే బ్రిజేష్‌ ట్రిబ్యునల్‌ ఆదేశాలు ఇచ్చిందని గుర్తుచేసింది. గోదావరి-కావేరి అనుసంధాన ప్రాజెక్టును ఇచ్చంపల్లి నుంచి చేపట్టాలని తెలంగాణ ప్రతిపాదించింది. 148 టీఎంసీల్లో సగం వాటా ఇవ్వడంతో పాటు, ఈ ప్రాజెక్టు ద్వారా 200 టీఎంసీల నీటిని తరలించుకునేలా అనుమతించాలని కోరింది.