సూర్య ‘సీన్‌’లో అసలైన విలన్‌ ఎవరు?

‘ప్రేమలు’ చిత్రంతో మలయాళంతో పాటు తెలుగులోనూ మంచి గుర్తింపు తెచ్చుకున్న యువ నటుడు నస్లెన్‌ ప్రస్తుతం కోలీవుడ్‌ స్టార్‌ హీరో సూర్య నటిస్తున్న ‘సీన్‌’ చిత్రంలో కీలక పాత్రలో కనిపించనున్నాడు. ‘ఆవేశం’ ఫేమ్‌ జీతూ మాధవన్‌ దర్శకత్వంలో తెరకెక్కుతున్న ఈ యాక్షన్‌ డ్రామా సూర్య కెరీర్‌లో 47వ చిత్రంగా రూపొందుతోంది. ఇప్పటికే విడుదలైన టైటిల్‌ గ్లింప్స్‌లో సూర్య డీఎస్పీ ప్రేమ్‌ రాజ్‌గా కనిపించి అభిమానుల్లో ఆసక్తిని పెంచారు. ఈ చిత్రంలో నస్లెన్‌ కూడా కీలక పాత్ర పోషిస్తున్న విషయం తెలిసిందే.

తాజాగా నస్లెన్‌ పాత్రకు సంబంధించి ఆసక్తికరమైన వార్త వినిపిస్తోంది. ‘సీన్‌’లో నస్లెన్‌ ప్రతినాయకుడిగా, సీరియల్‌ కిల్లర్‌గా కనిపించనున్నట్లు సమాచారం. ఓ సీరియల్‌ కిల్లర్‌ను పట్టుకునే క్రమంలో సూర్య పోషిస్తున్న ఉల్లాసంగా, కూల్‌గా, స్టైలిష్‌గా ఉండే పోలీస్‌ అధికారి చేసే దర్యాప్తు చుట్టూ కథ సాగనున్నట్లు తెలుస్తోంది. ఈ చిత్రం పూర్తిస్థాయి ఇన్వెస్టిగేషన్‌ థ్రిల్లర్‌గా తెరకెక్కుతున్నట్లు వార్తలు వస్తున్నాయి. నజ్రియా నజీమ్‌ కథానాయికగా నటిస్తుండగా, సుశిన్‌ శ్యామ్‌ సంగీతం అందిస్తున్నారు. దీపావళి కానుకగా నవంబర్‌ 6, 2026న ఈ చిత్రం థియేటర్లలో విడుదల కానుంది.