రోజూ కాఫీ తాగుతున్నారా? వైద్యులు సూచించిన నిజాలు తెలుసుకోండి

కాఫీ కేవలం నిద్ర మత్తు పోగొట్టే పానీయం మాత్రమే కాదు.. కాలేయ ఆరోగ్యాన్ని కాపాడడంలో కూడా సహాయపడవచ్చని తాజా అధ్యయనం వెల్లడించింది. కాఫీ తాగే వారిలో సిర్రోసిస్, కాలేయ క్యాన్సర్ వంటి తీవ్రమైన కాలేయ వ్యాధుల ప్రమాదం తగ్గే అవకాశం ఉందని పరిశోధకులు తెలిపారు. అయితే దీని అర్థం ప్రతి ఒక్కరూ రోజుకు ఐదు కప్పుల కాఫీ తాగాలని కాదని ఆరోగ్య నిపుణులు స్పష్టం చేస్తున్నారు.

క్లినికల్ గ్యాస్ట్రోఎంటరాలజీ అండ్ హెపటాలజీ జర్నల్‌లో ప్రచురితమైన ఈ అధ్యయనంలో యూకే బయోబ్యాంక్‌కు చెందిన సుమారు 3.55 లక్షల మంది ఆరోగ్య వివరాలను పదేళ్లకు పైగా పరిశీలించారు. రోజుకు ఐదు లేదా అంతకంటే ఎక్కువ కప్పుల కాఫీ తాగేవారిలో సిర్రోసిస్ ప్రమాదం 32 శాతం, కాలేయ క్యాన్సర్ ప్రమాదం 47 శాతం, కాలేయ వ్యాధులతో మరణించే ప్రమాదం 42 శాతం వరకు తగ్గినట్లు గుర్తించారు. డీక్యాఫినేటెడ్ కాఫీ తాగిన వారిలో కూడా ఇలాంటి ప్రయోజనాలు కనిపించడంతో కాఫీలోని యాంటీఆక్సిడెంట్లు, పాలీఫెనాల్స్ కీలక పాత్ర పోషిస్తున్నాయని పరిశోధకులు భావిస్తున్నారు.

అయితే కాఫీలో అధికంగా చక్కెర, కృత్రిమ స్వీటెనర్లు లేదా ఫ్లేవర్డ్ క్రీమర్లు కలిపితే ఆరోగ్య ప్రయోజనాలు తగ్గే అవకాశం ఉందని నిపుణులు హెచ్చరిస్తున్నారు. అలాగే అధిక కెఫిన్ వల్ల ఆందోళన, నిద్రలేమి, గుండె వేగంగా కొట్టుకోవడం, జీర్ణ సమస్యలు తలెత్తవచ్చు. గర్భిణీలు, గుండె సంబంధిత సమస్యలు ఉన్నవారు, కెఫిన్‌కు సున్నితంగా స్పందించే వారు వైద్యుల సలహా మేరకే కాఫీ పరిమాణాన్ని నిర్ణయించుకోవాలని సూచిస్తున్నారు.

గమనిక: పై సమాచారం అవగాహన కోసం మాత్రమే అందించబడింది. ఆరోగ్యానికి సంబంధించిన ఏ నిర్ణయం తీసుకునే ముందు తప్పనిసరిగా అర్హత కలిగిన వైద్యుడిని సంప్రదించి, వారి సూచనలను పాటించండి.