చుండ్రును నిర్లక్ష్యం చేయొద్దు.. నిపుణుల హెచ్చరిక

చుండ్రును చాలామంది సాధారణ సమస్యగా భావించి నిర్లక్ష్యం చేస్తారు. కానీ ఇది ఎక్కువకాలం కొనసాగితే తల చర్మంలో వాపు, ఎర్రబారడం, గాయాలు, జుట్టు రాలడం వంటి సమస్యలకు దారితీసే అవకాశం ఉందని నిపుణులు హెచ్చరిస్తున్నారు. చుండ్రు తగ్గిన వెంటనే చికిత్స ఆపేయడం వల్ల సమస్య మళ్లీ రావచ్చని సూచిస్తున్నారు. మెడికేటెడ్ షాంపూలను వైద్యుల సలహా మేరకు ఉపయోగించాలని, షాంపూను తలకు రాసిన తర్వాత 3 నుంచి 5 నిమిషాలు ఉంచి కడగాలని సూచిస్తున్నారు.

తల చర్మాన్ని శుభ్రంగా ఉంచుకోవడం, అధికంగా నూనెలు, హెయిర్ స్టైలింగ్ ఉత్పత్తులు వాడకపోవడం, తలను తరచూ గోకకుండా జాగ్రత్తపడటం చుండ్రు నియంత్రణలో కీలకమని నిపుణులు చెబుతున్నారు. వారానికి రెండు లేదా మూడు సార్లు జుట్టు శుభ్రం చేసుకోవడం, పోషకాహారం తీసుకోవడం, తగినంత నీరు తాగడం, ఒత్తిడిని తగ్గించుకోవడం అవసరమని సూచిస్తున్నారు. తీవ్రమైన దురద, వాపు, జుట్టు అధికంగా రాలడం వంటి లక్షణాలు ఉంటే వైద్యులను సంప్రదించాలని తెలిపారు.