మన శంకర వర ప్రసాద్ గారు మూవీ నుంచి మెగాస్టార్ న్యూ లుక్ పోస్టర్ రిలీజ్

మెగాస్టార్ చిరంజీవి నటిస్తున్న చిత్రం ‘మన శంకర వరప్రసాద్ గారు’ కోసం ప్రేక్షకులు ఎంతో ఆసక్తిగా ఎదురుచూస్తున్నారు. హిట్ దర్శకుడు అనిల్ రావిపూడి దర్శకత్వంలో రూపొందుతున్న ఈ చిత్రం సంక్రాంతి కానుకగా 2026 జనవరి 12న థియేటర్లలో విడుదల కానుంది. రిలీజ్‌కు ఇంకా కేవలం 20 రోజులు మాత్రమే మిగిలి ఉండడంతో సినిమాపై అంచనాలు మరింత పెరిగాయి. ఈ సినిమాను షైన్ స్క్రీన్స్ మరియు గోల్డ్ బాక్స్ ఎంటర్‌టైన్‌మెంట్స్ బ్యానర్లపై సాహు గారపాటి, సుస్మిత కొణిదెల నిర్మిస్తున్నారు. అర్చన ఈ చిత్రాన్ని సమర్పిస్తున్నారు.

20 రోజుల కౌంట్‌డౌన్ సందర్భంగా మేకర్స్ తాజాగా ఓ కొత్త పోస్టర్‌ను విడుదల చేశారు. ఈ పోస్టర్‌లో చిరంజీవి బ్లాక్ సూట్, వైట్ షర్ట్‌లో స్టైలిష్‌గా కనిపిస్తున్నారు. కళ్లద్దాలు ధరించి, చేతిలో తుపాకీ పట్టుకుని లగ్జరీ బంగ్లాలో కూల్‌గా కూర్చున్న ఆయన లుక్ అభిమానులను విశేషంగా ఆకట్టుకుంటోంది. స్టైల్, పవర్, స్వాగ్ అన్నీ ఒకే ఫ్రేమ్‌లో కనిపిస్తున్నాయి.

ఇదిలా ఉండగా, చిరంజీవి – వెంకటేష్ కలిసి డాన్స్ చేసిన మూడో పాటను త్వరలోనే విడుదల చేయడానికి టీమ్ సిద్ధమవుతోంది. ఈ పాట కోసం అభిమానులు ఎంతో ఆసక్తిగా ఎదురుచూస్తున్నారు. ప్రస్తుతం డబ్బింగ్‌తో పాటు ఇతర పోస్ట్ ప్రొడక్షన్ పనులు వేగంగా కొనసాగుతున్నాయి. ఈ సినిమాను పూర్తి స్థాయి మాస్ ఎంటర్‌టైనర్‌గా రూపొందిస్తున్న అనిల్ రావిపూడి, ప్రమోషన్స్‌పై కూడా ప్రత్యేక శ్రద్ధ తీసుకుంటున్నారు.