అక్షయ్ కుమార్, సైఫ్ అలీఖాన్ ‘హైవాన్’ టీజర్ రిలీజ్..

అక్షయ్ కుమార్, సైఫ్ అలీఖాన్ ప్రధాన పాత్రల్లో ప్రముఖ దర్శకుడు ప్రియదర్శన్ తెరకెక్కిస్తున్న మోస్ట్ అవేటెడ్ థ్రిల్లర్ ‘హైవాన్’ టీజర్‌ను మేకర్స్ విడుదల చేశారు. కేవీఎన్ ప్రొడక్షన్స్, తెస్పియన్ ఫిలింస్ సంయుక్తంగా నిర్మిస్తున్న ఈ సినిమా సెప్టెంబర్ 11న గ్రాండ్ థియేట్రికల్ రిలీజ్‌కు సిద్ధమవుతోంది. ఈ చిత్రంలో అక్షయ్ కుమార్ తొలిసారి నెగిటివ్ షేడ్స్ ఉన్న పాత్రలో కనిపించనుండటం విశేషం. విడుదలైన టీజర్ ఆద్యంతం ఆసక్తికరంగా సాగుతూ కథపై క్యూరియాసిటీ పెంచుతోంది.

టీజర్‌లో సైఫ్ అలీఖాన్ పాత్రను దివ్యాంగుడిగా పరిచయం చేయగా, అక్షయ్ కుమార్ ఇంటెన్స్ లుక్, పెర్ఫార్మెన్స్‌తో ఆకట్టుకున్నారు. భవనం పై నుంచి నోట్ల కట్టలు కిందికి పడటం, తీవ్ర గాయాలతో ఓ వ్యక్తి సహాయం కోసం ఎదురుచూడటం వంటి సన్నివేశాలు సినిమాపై ఆసక్తిని పెంచుతున్నాయి. బొమన్ ఇరానీ, సయామీ ఖేర్, శ్రియ పిల్గాంకర్ కీలక పాత్రల్లో నటిస్తున్న ఈ సినిమాలో అక్షయ్ కుమార్, సైఫ్ అలీఖాన్ 17 ఏళ్ల తర్వాత కలిసి నటిస్తున్నారు. ప్రియదర్శన్ మార్క్ థ్రిల్లర్‌గా ‘హైవాన్’ రూపొందుతున్నట్లు టీజర్ స్పష్టం చేస్తోంది.