‘పవన్.. మీ ప్రయాణం అద్భుతం’.. సినీ ప్రస్థానంపై అల్లు అరవింద్ ప్రశంసలు

ఆంధ్రప్రదేశ్ ఉప ముఖ్యమంత్రి, అగ్రనటుడు పవన్ కళ్యాణ్ సినీ ప్రయాణం 30 ఏళ్లు పూర్తి చేసుకుంది. ఈ సందర్భంగా ప్రముఖ నిర్మాత అల్లు అరవింద్ ఆయనకు హృదయపూర్వక శుభాకాంక్షలు తెలిపారు. సోషల్ మీడియా వేదికగా స్పందిస్తూ, వీరిద్దరూ కలిసి పనిచేసిన తొలి చిత్రం ‘అక్కడ అమ్మాయి ఇక్కడ అబ్బాయి’ విడుదలై అప్పుడే 30 ఏళ్లు పూర్తయ్యాయంటే ఆశ్చర్యంగా ఉందని పేర్కొన్నారు. సినీ పరిశ్రమలో పవన్ కళ్యాణ్ ప్రయాణాన్ని అభినందిస్తూ, ఆయన ఎంచుకున్న ప్రతి మార్గంలో మరిన్ని విజయాలు సాధించాలని ఆకాంక్షించారు.

సినిమాలకే పరిమితం కాకుండా సమాజం కోసం పవన్ కళ్యాణ్ చేస్తున్న సేవలను కూడా అల్లు అరవింద్ ప్రత్యేకంగా ప్రశంసించారు. ఈవీవీ సత్యనారాయణ దర్శకత్వంలో, అల్లు అరవింద్ నిర్మాణంలో తెరకెక్కిన ‘అక్కడ అమ్మాయి ఇక్కడ అబ్బాయి’ చిత్రంలో పవన్ కళ్యాణ్, సుప్రియ యార్లగడ్డ ప్రధాన పాత్రల్లో నటించారు. 1996లో విడుదలైన ఈ సినిమా ఇద్దరికీ తొలి చిత్రంగా నిలిచింది. తెలుగు సినీ పరిశ్రమలో పవన్ కళ్యాణ్ ప్రయాణానికి ఈ చిత్రం ఒక ముఖ్యమైన ఆరంభంగా నిలిచింది.