మన్నత్‌ నుంచి బుర్జ్‌ ఖలీఫా వరకు షారుక్‌ పుట్టినరోజు వేడుకలు!

బాలీవుడ్‌ సూపర్‌స్టార్‌ షారుక్‌ ఖాన్‌ 61వ పుట్టినరోజు సందర్భంగా ముంబయిలో సందడి నెలకొంది. ఆయనకు శుభాకాంక్షలు తెలిపేందుకు అభిమానులు పెద్ద సంఖ్యలో నివాసం మన్నత్‌ వద్దకు చేరుకున్నారు. అభిమానుల ప్రేమకు షారుక్‌ కృతజ్ఞతలు తెలిపారు. ‘‘మీ అందరి ప్రేమకు, శుభాకాంక్షలకు ధన్యవాదాలు. నేను కూడా మీ అందర్నీ అంతే ప్రేమిస్తున్నా’’ అంటూ అభిమానులను ఉద్దేశించి సందేశం ఇచ్చారు. మరోవైపు, ముంబయిలోని బాంద్రా-వర్లీ సీ లింక్‌పై షారుక్‌ ఫొటోను ప్రదర్శించారు. దీనిపై ఆయన ఎక్స్‌లో సరదాగా స్పందిస్తూ, ఆ ఫొటోను చూసేందుకు చిన్నగా డ్రైవ్‌కు వెళ్లాల్సి వచ్చిందని పేర్కొన్నారు. తనపై ఇంతటి ప్రేమ చూపిస్తున్న అభిమానులకు ధన్యవాదాలు తెలిపారు.

షారుక్‌ పుట్టినరోజు వేడుకలు ముంబయికే పరిమితం కాలేదు. ప్రపంచంలోనే అత్యంత ఎత్తైన భవనం బుర్జ్‌ ఖలీఫాపైనా ఆయనకు ప్రత్యేకంగా శుభాకాంక్షలు తెలిపారు. ‘వి లవ్‌ యూ’ అనే సందేశాన్ని భవనంపై ప్రదర్శించారు. ఇక సినిమాల విషయానికొస్తే, షారుక్‌ ప్రధాన పాత్రలో సిద్ధార్థ్‌ ఆనంద్‌ దర్శకత్వం వహిస్తున్న చిత్రం కింగ్‌ విడుదలకు సిద్ధమవుతోంది. దీపికా పదుకొణె కథానాయికగా నటిస్తున్న ఈ సినిమా డిసెంబర్‌ 24న ప్రేక్షకుల ముందుకు రానుంది.