అల్లు అర్జున్ ‘రాకా’ రిలీజ్‌పై అట్లీ క్లారిటీ.. త్వరలోనే ప్రకటన!

కోలీవుడ్ స్టార్ డైరెక్టర్ అట్లీ, ఐకాన్ స్టార్ అల్లు అర్జున్ కాంబినేషన్‌లో తెరకెక్కుతున్న భారీ చిత్రంపై అభిమానుల్లో భారీ అంచనాలు ఉన్నాయి. ‘రాకా’ అనే వర్కింగ్ టైటిల్‌తో ప్రచారంలో ఉన్న ఈ సినిమాను అంతర్జాతీయ స్థాయి హంగులతో రూపొందిస్తున్నట్లు సమాచారం. ప్రస్తుతం ఈ మూవీ షూటింగ్ ముంబైలో కొనసాగుతోంది. అల్లు అర్జున్, అట్లీ కలయిక కావడంతో సినిమా ప్రారంభం నుంచే దీనిపై భారీ హైప్ నెలకొంది.

అయితే ఈ సినిమాకు సంబంధించి అభిమానుల్లో చాలాకాలంగా ఉన్న ప్రధాన ప్రశ్న రిలీజ్ డేట్ ఎప్పుడు అనేదే. సినిమా అప్‌డేట్స్ ఆలస్యం అవుతుండటంతో అభిమానులు కూడా సరదాగా టీజర్ ఒక ఏడాది, ట్రైలర్ మరో ఏడాది, సినిమా ఇంకో ఏడాది వస్తుందని కామెంట్లు చేస్తున్నారు. ఈ నేపథ్యంలో దర్శకుడు అట్లీ తాజాగా రిలీజ్‌పై స్పందించారు. సినిమా విడుదల తేదీ గురించి నిర్మాత కూడా తనను ఇంకా అడగలేదని, అయితే త్వరలోనే రిలీజ్‌కు సంబంధించిన క్లారిటీ ఇస్తామని ఆయన తెలిపారు. దీంతో ‘రాకా’ విడుదలపై నెలకొన్న సస్పెన్స్‌కు త్వరలోనే తెరపడే అవకాశం ఉంది.