అజయ్‌ దేవ్‌గణ్‌కు బీఎంసీ నోటీసులు..

బాలీవుడ్‌ నటుడు అజయ్‌ దేవ్‌గణ్‌కు బృహన్‌ ముంబయి మున్సిపల్‌ కార్పొరేషన్‌ (బీఎంసీ) అధికారులు నోటీసులు జారీ చేశారు. ముంబయిలోని జుహులో ఉన్న ఆయన బంగ్లాలో నిర్మాణ పనులు జరుగుతున్న నేపథ్యంలో ఈ నోటీసులు ఇచ్చారు. అక్కడ సెలూన్‌, స్పా ఏర్పాటు చేసేందుకు పనులు జరుగుతున్నాయని, ఇందుకు అవసరమైన ముందస్తు అనుమతులు తీసుకోలేదని బీఎంసీ అధికారులు తెలిపారు. వెంటనే నిర్మాణ పనులను నిలిపివేయాలని ఆదేశించారు.

హౌసింగ్‌ సొసైటీ నుంచి అందిన ఫిర్యాదు ఆధారంగా ఈ చర్యలు తీసుకున్నట్లు బీఎంసీ వెల్లడించింది. ఆ ప్రాంగణాన్ని వాణిజ్య అవసరాలకు వినియోగించేందుకు ఎలాంటి అనుమతి ఇవ్వలేదని అధికారులు స్పష్టం చేశారు. ఫిర్యాదు అందిన అనంతరం అజయ్‌ దేవ్‌గణ్‌ను వివరణ ఇవ్వాలని కోరామని, ఆయన నుంచి స్పందన రాకపోవడంతో నోటీసులు జారీ చేసినట్లు తెలిపారు.